Özbəkistan 2025-ci ildə Əfqanıstana elektrik enerjisi tədarükünü davam etdirəcək

Özbəkistan Əfqanıstana elektrik enerjisinin ixracına dair sazişin müddətini 2025-ci ilə qədər uzadıb, Əfqanıstanın Breşna Şirkat (DABS) şirkətinin mətbuat xidməti məlumat yayıb.

Özbəkistanın energetika naziri Jurabek Mirzamaxmudovun rəhbərlik etdiyi nümayəndə heyəti Əfqanıstana səfər edib. Energetika Nazirliyinin rəhbəri DABS-in baş direktoru Əbdül Bari Ömər ilə danışıqlar aparıb. Görüşün nəticəsi olaraq “Uzenergosotish” və Əfqanıstanın DABS şirkəti arasında 2025-ci il üçün elektrik enerjisinin alqı-satqısı müqaviləsi (PPA) imzalanıb.

Tərəflər həmçinin Özbəkistandan Əfqanıstana 500 kV-luq elektrik verilişi xəttinin tikintisi üzrə “hərtərəfli və ətraflı” texniki müzakirələr aparıblar.

Ölkələr razılığa gəliblər ki, təfərrüatlı texniki təhlil başa çatdıqdan sonra Surxandan Puli-Xumriyə, sonra isə Kabilə çatacaq elektrik ötürücü xəttinin yaradılması üzrə işlərə başlanılacaq. Bu elektrik xəttində işlərin başlama tarixi bir neçə dəfə geri çəkilib.

Bu layihənin həyata keçirilməsi nəticəsində Əfqanıstan sutkada 24 milyon kilovatsaat və ya ildə 6 milyard kilovatsaat elektrik enerjisi ilə təmin olunacaq. Layihəyə uyğun olaraq elektrik xəttinin ümumi uzunluğu 245,6 km-dir. Bunun 45 km-i Özbəkistan, 200,6 km-i isə Əfqanıstan ərazisindədir.

2022-ci ilin iyulunda Əfqanıstanda həyata keçirilən layihənin dəyəri 100,1 milyon dollar olaraq qiymətləndirilib.

TOLO News-un məlumatına görə, hazırda Əfqanıstan elektrik enerjisinə tələbatının yalnız 20%-ni daxili istehsal edir, elektrik enerjisinin 80%-i isə Özbəkistan, Tacikistan, Türkmənistan və İrandan idxal olunur. Taliban noyabrın sonunda Tacikistanla, dekabrın 7-də isə Türkmənistanla müqavilə imzalayıb.

Xatırladaq ki, ötən ilin dekabrında Özbəkistan və Əfqanıstan elektrik enerjisinin tədarükünə dair sazişin müddətini 2024-cü ilə qədər uzadıb.

2019-cu ilin sentyabrında Özbəkistanın Milli Elektrik Şəbəkələri müəssisəsi “Da Afghanistan Breshna Sherkat” şirkəti ilə 10 il müddətinə elektrik enerjisinin tədarükünə dair müqavilə bağlayıb. Daha sonra energetika nazirinin müavini Şerzod Xocayev məlumat verib ki, ilkin mərhələdə tədarükün həcmi 4,2 milyard kilovatsaata, sonradan isə 6 milyard kilovatsaata çatdırılacaq.

Oxuməni.az