Si Cinpin  Vladimir Putinlə videokonfrans vasitəsilə danışıb

Çərşənbə axşamı günortadan sonra Pekindəki Xalq Yığıncaq Salonunda Çin Prezidenti Si Cinpin Rusiya Prezidenti Vladimir Putinlə videokonfrans vasitəsilə danışıqlar aparıblar. Bu barədə Oxuməni.az “Sinxua” agentliyinə istinadən məlumat yayıb.
Putin iki ölkə arasında artan ticarət dövriyyəsinə, sənaye, nəqliyyat, kənd təsərrüfatı və digər sahələrdə birgə layihələrin inkişaf etdirilməsinə diqqət çəkib.
Rusiya və Çinin birgə işi dünyada sabitləşdirici rol oynayır - bu barədə Rusiya lideri Vladimir Putin açıqlama verib, onun sözlərini Kremlin rəsmi Teleqram kanalı sitat gətirib.
Rusiya Federasiyasının Prezidenti, həmçinin qeyd edib ki, iki ölkə Avrasiyada və bütün dünyada bölünməz təhlükəsizliyin təmin edilməsi üzərində işləyir.
Görüş zamanı Rusiya lideri Rusiya Federasiyası ilə Çin arasında əks turist axınının artması, idman və təhsil mübadiləsi barədə də məlumat verib.
Si Cinpin isə öz növbəsində iki ölkə arasında ticarət dövriyyəsinin artdığını qeyd edib. O, ikitərəfli praktiki əməkdaşlığın genişləndirilməsi barədə məlumat verib, həmçinin Çin-Rusiya qaz kəmərinin şərq marşrutunun vaxtından əvvəl tam gücünə çatdırılmasından danışıb.
Bundan əlavə, Çin lideri Pekinin bu il Moskva ilə münasibətləri yeni zirvələrə qaldırmağa hazır olduğunu açıqlayıb.
Almaz Həsənli