Ramzan Kadırovun oğlu Zelenskiyə Maduro ssenarisi üzrə qaçırılma ilə hədələyib

Çeçenistan rəhbərinin 18 yaşlı köməkçisi və respublika Təhlükəsizlik Şurasının katibi Əhməd Kadırov, Ukrayna prezidenti Vladimir Zelenskinin son bəyanatlarına cavab verib. Kadırovun oğlu sosial şəbəkələrində Ukrayna liderini Venesuela prezidenti Nikolas Maduronun ABŞ xüsusi xidmət orqanları tərəfindən saxlanılması ilə müqayisə edərək, onu qaçırmağa hazır olduğunu bildirib.

Kadırovun oğlunun hədələri haqqında "Çeçenistan Respublikasının Xəbərləri" rəsmi nəşri məlumat yayıb.

"Ali Baş Komandan Vladimir Vladimiroviç Putin və ya atam bir söz desə, səni hər yerdə tapacağıq və bu, sadəcə vaxt məsələsidir. Əməliyyat elan etməyəcəyik. Sadəcə gəlib səni aparacağıq. Sahiblərinə artıq lazım olmayan bir əşyanı apardığı kimi," - nəşr Əhməd Kadırovun sözlərini sitat gətirir.

Çeçenistan rəhbərinin oğlunun sözlərinə görə, Ukrayna prezidenti Vladimir Zelenski Qroznıya dövlət başçısı statusunda deyil, "məhkəmə" keçirmək üçün gətirilməsi planlaşdırılır.

"Və səni bura, Qroznıya gətirəcəyik. Prezident kimi deyil, hərbi cinayətkar kimi. Və sən səhnədə deyil, təhqir etməyə çalışdığın torpağın üstündə dayanacaqsan," - Kiçik Kadırovun bəyanatında deyilir.

Bu cavab, Vladimir Zelenskinin Donald Trampa müraciətinə cavab olaraq verilib. Daha əvvəl Ukrayna prezidenti Maduronun saxlanılması ilə paralellik quraraq, Ramzan Kadırova qarşı sərt təzyiq alətlərinin tətbiqini təklif etmişdi.

"Rusiyaya təzyiq etmək üçün alətlər tapmaq lazımdır. Budur, sizə Madurodan bir nümunə. Bəli, əməliyyat keçirdilər. Keçirdilər? Keçirdilər. Nəticəni hamı gördü. Bütün dünya. Bunu tez etdilər. Yaxşı, onlar bu Kadırovla da belə bir əməliyyat etsinlər. Bəlkə onda Putin görər və düşünər," - Vladimir Zelenski qeyd etmişdi.

Almaz Həsənli