Diabet dərmanlarının yeni faydalı təsiri aşkarlanıb

Osaka Metropolitan Universitetinin alimləri müəyyən ediblər ki, şəkərli diabetin müalicəsində istifadə edilən SGLT2 inhibitorları böyrəklərdə qan dövranını yaxşılaşdırmağa kömək edir. Oxuməni.az “Gazeta.ru”-ya istinadən xəbər verir ki, tədqiqatın nəticələri "Frontiers in Endocrinology" jurnalında dərc olunub.
SGLT2 inhibitorları sidik vasitəsilə bədəndən artıq qlükozanı çıxarmağa kömək edən qlükozanı azaldan dərmanlar sinfidir. Alimlər bu cür dərmanların hansı əlavə təsirlərə malik olduğunu öyrənmək üçün qarşılarına məqsəd qoyublar. Onlar kanaqliflozin aktiv maddəsi olan dərmanlara diqqət yetiriblər.
Təcrübə zamanı alimlər kanaqliflozin qəbul edən xəstələrin böyrəklərinin vəziyyətini izləmək üçün MRT-dən istifadə ediblər. Terapiyanın başlamasından cəmi beş gün sonra eksperiment iştirakçıları böyrəklərdə oksigen səviyyəsinin artdığını müşahidə ediblər. Bu, qan dövranının yaxşılaşdığını və böyrəklərin zədələnmədən qorunmasının artdığını göstərir.
Tədqiqatçılar qeyd ediblər ki, onların işlərinin nəticələri böyrək xəstəliklərinin müalicəsinin təkmilləşdirilməsi üçün yeni perspektivlər açır. Alimlər əlavə edib ki, SGLT2 inhibitorlarının təsiri MRT- skanından istifadə etməklə asanlıqla izlənilə bilər ki, bu da xəstələrin monitorinqini asanlaşdırır.
Almaz Həsənli