Qadın dietik kola vasitəsilə mədəsindəki şişdən xilas olub

ABŞ-dan olan həkimlər yaşlı bir pasiyentin dietik kola sayəsində mədəsindəki böyük bir törəmədən xilas olduğu qeyri-adi bir hadisə barədə məlumat veriblər. Oxuməni.az xəbər verir ki, bu barədə "Oddity Central" yazır.

Qadın təxminən bir aydır keçməyən şiddətli mədə ağrısı şikayəti ilə həkimlərə müraciət edib. Adi mədə yanması dərmanları kömək etməyib.

Müayinə zamanı məlum olub ki, pasiyentin mədəsində həzm olunmamış qidadan ibarət sıx bir kütlə (bezoar) əmələ gəlib. Belə bir vəziyyətə nadir hallarda rast gəlinir, lakin bu, şiddətli ağrılara səbəb ola və hətta təhlükəli fəsadlara yol aça bilər.

Həkimlər bu problemi pasiyentin mədənin boşalmasını ləngidən semaglutid əsaslı arıqlama dərmanından istifadə etməsi ilə əlaqələndiriblər. Kütlə aşkar edildikdən sonra dərman qəbulu dərhal dayandırılıb.

Cərrahiyyə əməliyyatı əvəzinə, həkimlər əvvəlcə daha az invaziv bir üsulu sınamağa qərar veriblər. Qadına gündə bir yarım litr dietik kola içmək təyin edilib. Adətən belə hallarda üç litrə qədər içkidən istifadə olunur, lakin pasiyentin şəkərli diabeti olması və qazlı içki içmək istəməməsi səbəbindən doza azaldılıb.

Artıq ikinci gün qadın qarnında qeyri-adi hisslər duyub, bundan sonra ağrı və ürəkbulanma yox olmağa başlayıb. Təkrar endoskopiya kütlənin tamamilə əridiyini göstərib. Həkimlərin sözlərinə görə, bu təsirin dəqiq mexanizmi hələ də məlum deyil.

Həkimlər bunun içkinin turşuluğu, tərkibindəki karbon qazı və ya bir neçə amilin birləşməsi ilə bağlı olub-olmadığını dəqiq deyə bilmirlər. Mütəxəssislər vurğulayırlar ki, bu üsul yalnız həkim nəzarəti altında tətbiq olunur və hər pasiyent üçün uyğun deyil. Onlar mədə xəstəliklərini müalicə etmək üçün qazlı içkilərdən özbaşına istifadə etməyi tövsiyə etmirlər.

Almaz Həsənli