ABŞ tarixində ən uzun müddətli hökumət bağlanması başa çatdı
“CNN” xəbər verir ki, ABŞ Prezidenti Donald Tramp müvəqqəti hökumət maliyyələşdirməsi qanun layihəsini imzaladı və bununla da ABŞ tarixində ən uzun müddətli hökumət bağlanmasına (şatdaun-red.) son qoydu. Konqresin hər iki palatası tərəfindən təsdiqlənən sənəd, 30 yanvar 2026-cı ilə qədər maliyyələşdirmə təmin edir və federal agentliklərə 43 günlük bağlanmadan sonra dərhal yenidən açılmasına imkan verir.
Rekord qıran bağlanma Respublikaçılar və Demokratlar arasındakı qarşıdurmanın nəticəsi idi. Sonuncu büdcə qanun layihəsini təsdiqləməkdən imtina etdi, çünki o, 2025-ci ilin sonunda müddəti bitən Əlverişli Qayğı Qanunu (Obamacare kimi də tanınır-red.) çərçivəsində subsidiyaları uzatmadı. Əvvəlki illərdə ABŞ müvəqqəti büdcə qətnamələrinin köməyi ilə tammiqyaslı bağlanmalardan qaçınırdı, lakin bu dəfə Senatda birini qəbul etmək üçün səs çatışmırdı. Həll yolu yalnız bir qrup mülayim Demokrat və bir müstəqil senator büdcə qanun layihəsinə səs verməyə razı olduqda tapıldı.
Qanunun imzalanması zamanı Tramp seçiciləri növbəti seçkilərdə bağlanmanı unutmamağa çağırdı. O, demokratların "milyonlarla amerikalıların əziyyət çəkdiyini görməkdən məmnun olduqlarını" söylədi. Ağ Ev rəhbəri vurğuladı: "Heç kim belə bir şey görməyib". Bu arada, böhranı tətikləyən əsas məsələ hələ də həll olunmayıb: Respublikaçı senatorlar “Obamacare” subsidiyalarının uzadılması ilə bağlı ayrıca səsvermə vəd etsələr də, zəmanət verməyiblər. Növbəti iki ay yarım ərzində Konqres üzvləri tam federal büdcənin qəbul edilməsi üçün danışıqlar aparacaqlar.
İşin dayandırılması zamanı təxminən 700.000 federal işçi məzuniyyətə göndərilib və bəziləri işdən çıxarılma bildirişləri alıblar. Milli Qvardiya qoşunları, polis zabitləri, hava nəqliyyatı dispetçerləri və nəqliyyat işçiləri maaşsız işləməyə məcbur ediliblər. Maliyyələşdirmənin olmaması, təxminən 42 milyon amerikalıya xidmət göstərən SNAP (Əlavə Qidalanma Yardımı Proqramı) proqramının da fəaliyyətində fasilələrə səbəb olub.
Almaz Həsənli
