"Fənərbağça" Mourinyonu baş məşqçi postundan istefaya göndərdi
Türkiyənin "Fənərbağça" klubu baş məşqçi Joze Mourinyonu istefaya göndərdiyini açıqlayıb.
Oxuməni.az xəbər verir ki, bu barədə klubun rəsmi hesabı məlumat paylaşıb.
“Fənərbağça” seçmə mərhələdə “Benfika”ya uduzaraq (0:0, 0:1) Çempionlar Liqasının əsas mərhələsinə yüksələ bilməyib.
— 2024/25 mövsümündən peşəkar futbol komandamızın məşqçisi olan Joze Mourinyo ilə yollarımızı ayırdıq.
Biz ona komandamızın inkişafına verdiyi töhfəyə görə təşəkkür edirik və gələcək karyerasında uğurlar arzulayırıq”, - press-relizdə deyilir.
62 yaşlı portuqaliyalı Türkiyə klubunu 2024-cü ildən çalışdırır. Ötən mövsüm "Fənərbağça" ölkə çempionatının turnir cədvəlində ikinci yeri tutub.
Mourinyo “Porto” və “İnter”lə Çempionlar Liqasının qalibi olub, üçqat İngiltərə çempionu (“Çelsi” ilə), ikiqat İtaliya çempionu (“İnter”lə) və İspaniya çempionudur (“Real Madrid”lə). Portuqaliyalı həm də "Mançester Yunayted", "Tottenhem" və "Roma"da çalışıb.
Almaz Həsənli
