Fransada dəhşətli istilər can almaqda davam edir: Ən azı 18 nəfər ölüb
"Bir həftədə 25.000 nəfər ölə bilər" xəbərdarlıqlarından sonra Avropada isti dalğasının ilk ciddi nəticələri ortaya çıxdı. Fransada isti ilə əlaqəli hadisələr səbəbindən ən azı 18 nəfər ölüb və bir çox şəhərdə temperatur rekordları qırılıb. İtaliya, Böyük Britaniya, İspaniya və Belçikada da xəbərdarlıq səviyyəsi artırılıb və mütəxəssislər həddindən artıq istinin təsirinin yaxın günlərdə daha da güclənə biləcəyi barədə xəbərdarlıq ediblər.
Avropada baş verən anormal isti dalğası səbəbindən bu səhər beynəlxalq mediada bəzi diqqətəlayiq məlumatlar dərc olunub. Qeyd edilib ki, "əjdaha istiliyi dalğası" adlandırılan hava sistemi yaşlılar, uşaqlar və xroniki xəstələr üçün ciddi təhlükə yaradır, bəzi hesablamalara görə, bir həftə ərzində 25.000 ölüm hadisəsi baş verə bilər.
Hələlik rəsmi rəqəmlər olmasa da, istinin ilk ciddi təsirləri artıq özünü göstərməyə başlayır.
Fransada rekord temperaturlar zamanı insan tələfatı da baş verib. Vaklus departamentindəki Karpentrada iki və dörd yaşlı iki uşaq anaları tərəfindən avtomobildə huşsuz vəziyyətdə tapılıb və bütün səylərə baxmayaraq xilas edilə bilməyib.
Bordoda 80-95 yaşları arasında üç nəfər istidən qaynaqlanan sağlamlıq problemlərindən, həftəsonu isə 13 nəfər boğulma nəticəsində ölüb. Bu, istidən qaynaqlanan ölümlərin sayını ən azı 18-ə çatdırır.
Bordoda temperatur 41,9 dərəcə Selsiyə çatıb və ötən ilin rekordunu qırıb.
Puatyedə isə 41,2 dərəcə Selsi qeydə alınıb - bu, 1947-ci ildən bəri ən yüksək temperaturdur. Mütəxəssislər xəbərdarlıq edirlər ki, yaxın günlərdə temperatur daha da yüksələ bilər.
İtaliya istidən qovrulur
İtaliya Milan, Roma, Turin, Venesiya və Florensiya da daxil olmaqla 12 şəhər üçün qırmızı həyəcan siqnalı verib. Enerji istehlakının artması səbəbindən bəzi bölgələrdə elektrik kəsintiləri başlayıb.
Meteorologiya İdarəsi ölkənin ilin ən isti gününə hazırlaşdığını bildirib. Bəzi bölgələrdə temperatur 39 dərəcə Selsidən çox ola bilər ki, bu da tarixi iyun rekordlarını qıra bilər.
Belçika narıncı həyəcan siqnalı verib, İspaniya isə temperaturun mövsümi normaları 10 dərəcə Selsidən çox ola biləcəyini bildirib. Bir çox ölkədə səhiyyə müəssisələri və yerli hakimiyyət orqanları vətəndaşları mütləq zərurət olmadığı təqdirdə çölə çıxmamağa çağırır.
Əziz MUSTAFA
