Qazaxıstanda benzin və dizel yanacağnını ixracına qoyulan qadağanın müddəti uzadılıb

Qazaxıstan benzin, dizel yanacağı və müəyyən növ neft məhsullarının avtomobil yolu ilə ixracına qoyulan mövcud qadağanı altı ay müddətinə uzadıb. Oxuməni.az xəbər verir ki, bununla bağlı əmri Energetika Naziri Yerlan Akkenjenov imzalayıb.

Məhdudiyyətlər 22 noyabr 2026-cı ildən 22 may 2027-ci ilə qədər olan dövr üçün müəyyən edilib. Lakin sənəddə istisnalar nəzərdə tutulub. Aşağıdakılar ixrac edilə bilər:

• müəyyən növ sürtkü yağları;
• standart nəqliyyat vasitələrinin çənlərində yanacaq - gündə bir dəfədən çox olmayaraq;
• müvafiq qurum tərəfindən təsdiqləndikdən və lazımi sənədlər olduqda tədqiqat və sınaq üçün aviasiya yanacağı;
• hökumət tərəfindən müəyyən edildiyi kimi humanitar yardım üçün neft məhsulları.
• Dəmir yolu ilə müəyyən neft məhsullarının ixracı da eyni müddətə qadağan edilib. Hökumət qərarına əsasən, təsdiq edilmiş çatdırılma planları çərçivəsində benzin və humanitar yardım üçün neft məhsulları üçün istisnalar edilib.

2027-ci il yanvarın 1-dən iyunun 30-dək Avrasiya İqtisadi Birliyinin gömrük ərazisindən kənara yüngül distillatların, reaktiv yanacağın, dizel yanacağının, qaz yağlarının, toluolun, ksilolun və neft bitumunun ixracına qadağa qüvvədə olacaq.

Əziz MUSTAFA