Azərbaycan şirkəti Çin bazarındakı iştirakını genişləndirmək niyyətindədir
Alkoqollu və alkoqolsuz içkilər istehsalçısı olan Azərbaycan şirkəti A+Co, 5-10 noyabr tarixlərində Şanxayda keçiriləcək 8-ci Çin Beynəlxalq İdxal Sərgisində (CIIE) iştirak etməklə Çin bazarındakı iştirakını genişləndirmək niyyətindədir. Şirkətin ixrac meneceri Emil Hüseynov bunu “Sinxua” agentliyinə eksklüziv müsahibəsində bildirib.
"Məqsədimiz ixrac etdiyimiz məhsulların çeşidini genişləndirməkdir. Təbii nar şərabları ilə yanaşı, alkoqolsuz içkilər də istehsal edirik və məhsullarımızı Çin istehlakçılarına təqdim etmək istəyirik", - deyə o qeyd edib.
A+Co Çinə şərab tədarük edir və əvvəllər 2019 və 2023-cü illərdə CIIE-də iştirak edib. Şirkət nümayəndəsi qeyd edib ki, CIIE dünyanın ən böyük və ən nüfuzlu sərgilərindən biridir və orada iştirak Çin bazarında uğurla fəaliyyət göstərən distribyutorlar və şəbəkə pərakəndə satış şirkətləri ilə əlaqə qurmaq üçün imkanlar açır.
“CIIE təkcə Çin şirkətləri ilə deyil, həm də digər ölkələrin iri şirkətlərinin nümayəndələri ilə görüşə biləcəyiniz böyük beynəlxalq platformadır. Bu, tərəfdaşlıq və işgüzar münasibətlər qurmaq üçün əla fürsət yaradır”, - deyə E.Hüseynov bildirib.
Onun sözlərinə görə, Çin bazarı yüksək rəqabətədavamlıdır və sürətlə inkişaf edir, lakin Azərbaycan istehsalçıları onun tələblərinə uyğunlaşmağa hazırdırlar.
“Biz Çin istehlakçılarının üstünlüklərini anlamağa çalışırıq. Bu sərgidə məhsullarımızın ixracını təmin etmək əzmindəyik və məhsullarımızın Çinin bütün bölgələrindəki mağaza rəflərində görünməsini təmin etmək üçün çalışacağıq”, - deyə o bildirib.
E.Hüseynov həmçinin Azərbaycan və Çin arasında ikitərəfli əlaqələrin inkişafının ticarət və əməkdaşlığın daha da artmasına töhfə verəcəyinə əminliyini ifadə edib.
“Ölkələrimiz arasında qarşılıqlı razılaşmalar sayəsində viza maneələri aradan qaldırılıb və hər iki ölkənin biznes nümayəndələri arasında ünsiyyət asanlaşıb. İnanıram ki, ölkələrimizin davamlı dəstəyi ticarət dövriyyəsinin əhəmiyyətli dərəcədə artmasına töhfə verəcək”, - deyə o, yekunlaşdırıb.
Almaz Həsənli
