Deşam Dünya Kubokundan sonra Səudiyyə Ərəbistanı komandasını çalışdıra bilər
Fransa millisinin baş məşqçisi Didye Deşam 2026-cı il Dünya Kubokundan sonra Səudiyyə Ərəbistanının "Əl-İttihad" komandasını çalışdıra bilər.
Deşam əvvəllər ABŞ, Kanada və Meksikada keçiriləcək 2026-cı il Dünya Kubokundan sonra vəzifəsindən ayrılacağını açıqlamışdı. Fransa mediasının məlumatına görə, "Real Madrid"in keçmiş məşqçisi Zinəddin Zidan Fransanın yeni baş məşqçisi vəzifəsinə əsas namizəddir.
Deşam 2012-ci ildən bəri Fransa milli komandasını çalışdırır. Onun rəhbərliyi altında "Mavilər" 2018-ci ildə Rusiyada keçirilən Dünya Kubokunu, 2021/22 Millətlər Liqasını qazanıb, 2022-ci ildə Qətərdə keçirilən Dünya Kubokunun və 2016-cı ildə Fransada keçirilən Avropa Çempionatının finalına çıxıb.
"Əl-İttihad"da üç fransız oyunçu var: Kərim Benzema, N'Qolo Kanté və Musa Diabi. Komanda Səudiyyə Ərəbistanı liqasının səkkiz oyununda 11 xal toplayıb və səkkizinci yerdədir.
Əziz MUSTAFA
