2026-cı il Dünya Çempionatında matçlardan əvvəl enerji ilə doldurulmalı olan toplardan istifadə olunacaq

2026-cı il futbol üzrə Dünya Çempionatında istifadə olunacaq toplar matçlardan əvvəl enerji ilə doldurulmalıdır, çünki onların içərisində hərəkət sensoru quraşdırılıb. Oxuməni.az xəbər verir ki, bu barədə “Yahoo Sports” məlumat yayıb.
Sensor real vaxt rejimində məlumatları qeyd edir və birbaşa VAR otağına ötürür. Bu texnologiyanın hakimlərə ofsaytlar və əl oyunu kimi müxtəlif mübahisəli epizodlarda qərar qəbul etməkdə kömək edəcəyi gözlənilir.
"Sensor batareya olmadan işləyə bilməz. Hər bir top oyunun əvvəlində stadiondakı xüsusi stenddə enerji ilə doldurulur ki, oyun boyu və ondan sonra optimal işləməsi təmin edilsin. Batareya ən yüksək standartlara cavab verir ki, bu da cihazın oyunun davam etdiyi müddətdən bir neçə dəfə daha uzun müddət işləməsinə imkan verir," - deyə “Yahoo Sports”-un sitat gətirdiyi top istehsalçısı şirkətin nümayəndəsi qeyd edib.
"Ağıllı" topların hazırlanmasında iştirak edən texnologiya şirkəti tam doldurulma üçün təxminən 90 dəqiqə lazım olduğunu və batareyanın altı saat aktiv istifadə üçün nəzərdə tutulduğunu bildirib.
Almaz Həsənli