FİFA Dünya Çempionatında ənənəvi himn səsləndirmə mərasimini dəyişib
ABŞ, Kanada və Meksikada keçiriləcək 2026-cı il Dünya Çempionatının təşkilatçıları, iştirakçı ölkələrin dövlət himnlərinin səsləndirilməsi üçün mövcud proseduru dəyişmək qərarına gəliblər. Yeni qaydalara əsasən, matçdan əvvəl meydana yalnız start heyətinin futbolçuları deyil, həm də konkret oyun üçün heyətə daxil edilmiş bütün oyunçular çıxacaq. Oxuməni.az xəbər verir ki, bu barədə Fransa nəşri “L’Équipe” məlumat yayıb.
Yenilik idmançıların meydandakı düzülüşünə də təsir edəcək. Təşkilatçıların planına görə, bütün futbolçular mərkəzi dairənin perimetri boyunca bir-birinə tərəf çevrilərək düzüləcəklər. Beləliklə, tamaşaçılar adi 11 oyunçu cərgəsi deyil, əsas və ehtiyat oyunçularının hamısını birlikdə görəcəklər. Bu, mərasimi daha təsirli etməli və komanda ruhunu vurğulamalıdır.
Xatırladaq ki, 2026-cı il Dünya Çempionatı iştirakçıların sayı baxımından rekord olacaq: turnirdə 48 milli komanda iştirak edəcək. Açılış matçı iyunun 11-də keçiriləcək, Meksika və CAR yığmaları qarşılaşacaq. Oyunun başlanğıcı Bakı vaxtı ilə saat 23:00-a planlaşdırılıb. Final iyulun 19-da keçiriləcək. Turnir ilk dəfə üç ölkə tərəfindən birgə qəbul edilir.
Himn səsləndirmə formatının dəyişdirilməsi qarşıdakı mundialın bir çox yeniliklərindən biridir. Təşkilatçılar tədbiri daha dinamik və yaddaqalan etməyə çalışırlar. Hələlik bu təcrübənin digər FİFA turnirlərinə də şamil olunub-olunmayacağı və ya yalnız 2026-cı il Dünya Çempionatına xas bir yenilik olaraq qalacağı məlum deyil.
Almaz Həsənli
