Opta superkompüteri Argentina millisini 2026-cı il Dünya Çempionatının əsas üç favorit siyahısına daxil etməyib

Britaniyanın analitik şirkəti olan "Opta", superkompüter vasitəsilə apardığı təhlilin nəticələrini açıqlayıb. Oxuməni.az xəbər verir ki, turnirin dörddəbir final mərhələsi ərəfəsində dərc olunan proqnoza görə, Argentina millisi Dünya Çempionatının əsas favoritləri siyahısından kənarda qalıb.

Hazırkı qiymətləndirməyə əsasən, Argentina komandası 15,9% qələbə şansı ilə dördüncü yerdə qərarlaşıb. 1/8 final mərhələsinin əvvəlində isə komanda 16,32% şansla ikinci pillədə idi.

Turnirin əsas favoriti Fransa millisi hesab olunur (27,62%). Baxmayaraq ki, onların qələbə ehtimalı əvvəlki mərhələ ilə müqayisədə (28,89%) bir qədər azalıb. Fransızların əsas rəqibi isə İspaniya (əvvəlki 12,96%-dən 21,54%-ə yüksəlib) hesab edilir.

Reytinqdə üçüncü yeri İngiltərə millisi tutur; onların kuboku qazanmaq şansı iki dəfədən çox artaraq 8,14%-dən 17,06%-ə çatıb.

Sistemin proqnozlarına görə, qələbə şansı ən az olan komandalar Norveç (6,50%), Mərakeş (4,04%), Belçika (3,86%) və İsveçrədir (3,46%). Bu komandaların hər biri üçün dünya çempionluğu tarixi bir nailiyyət olardı.

Qeyd edək ki, 1/8 finalda argentinalılar Misir millisi ilə qarşılaşıb. 79-cu dəqiqəyə qədər 0:2 hesabı ilə geridə olmalarına baxmayaraq, Argentina komandası oyunu 3:2 hesabı ilə öz xeyrinə başa vurub.

2026-cı il Dünya Çempionatının dörddəbir final cütlükləri aşağıdakı kimidir:

• Fransa — Mərakeş
• İspaniya — Belçika
• Norveç — İngiltərə
• Argentina — İsveçrə

Xatırladaq ki, tarixdə ilk dəfə olaraq turnir ABŞ, Kanada və Meksikada 48 komandanın iştirakı ilə keçirilir. Final oyunu iyulun 19-da keçiriləcək. Argentina hazırkı Dünya Çempionudur.

Almaz Həsənli