Vens İranla müharibənin gedişi barədə komandirlərdən şəxsən məlumat toplayıb
ABŞ vitse-prezidenti Cey Di Vens ötən yaz və yay aylarında Yaxın Şərq, Avropa və Asiyada xidmət edən amerikalı hərbi komandirlərə şəxsən zəng edərək İranla müharibənin gedişi barədə onların fərdi və Pentaqon tərəfindən süzgəcdən keçirilməmiş qiymətləndirmələrini öyrənib. Oxuməni.az xəbər verir ki, bu barədə The New York Times nəşri fəaliyyətdə olan və keçmiş altıdan çox məmura istinadən məlumat yayıb.
Nəşrin yazdığına görə, əvvəlcə müharibənin başlanmasına qarşı çıxan Vens Trampdan münaqişənin başa çatdırılmasına nail olmaq tapşırığı alıb. O, hərbi rəhbərliyin vahid mövqeyinə çevrilməzdən əvvəl komandirlərin fikirlərini onların öz ifadələri ilə eşitmək istəyib.
Söhbətlər zamanı əməliyyatın məqsədləri və taktikası, itkilərin qiymətləndirilməsi, İranın Hörmüz boğazında mümkün addımları, İran ordusunun vəziyyətə uyğunlaşma qabiliyyəti və ABŞ-İsrail zərbələri fonunda ölkədəki hakimiyyətin nə qədər davam gətirə biləcəyi müzakirə olunub.
Vens ayrıca anbarlardakı silah ehtiyatları və Pentaqonun qüvvə və vasitələrinin Yaxın Şərqə göndərilməsinin ABŞ-ın Çin, Rusiya və Şimali Koreyanı çəkindirmək imkanlarına necə təsir edəcəyi ilə də maraqlanıb.
Məhz bu məsələdə komandirlər son dərəcə açıq danışıb. Onları ən çox Amerikanın hava hücumundan müdafiə sisteminin əsasını təşkil edən Patriot raketlərinin ehtiyatlarının tükənməsi narahat edib. Yazın sonuna qədər döyüş əməliyyatlarının aparıldığı məkanlardan birində belə raketlərin sayı 100-dən az qalmışdı.
Həmçinin ATACMS taktiki raket komplekslərinin və onları əvəz edən yüksək dəqiqlikli PrSM raketlərinin ehtiyatları demək olar ki, tükənib. Nəşrin həmsöhbətlərinin sözlərinə görə, həyati əhəmiyyət daşıyan sursat ehtiyatlarının bu qədər aşağı səviyyədə olması ilə onlar heç vaxt qarşılaşmayıblar.
Vensin bu söhbətlərdən çıxardığı nəticələr administrasiyanın yüksək vəzifəli şəxslərinin ictimaiyyət qarşısında söylədiklərindən ciddi şəkildə fərqlənib. Tramp müharibənin artıq qazanıldığını, İran ordusunun darmadağın edildiyini və silah təchizatı ilə bağlı heç bir problemin olmadığını bildirməkdə davam edir. Halbuki vitse-prezidentə çatdırılan real qiymətləndirmələr İran rəhbərliyinin sağ qalmaq naminə zərbələrə uzun müddət tab gətirməyə hazır olduğunu və ABŞ-ın hava hücumundan müdafiə vasitələrinin ehtiyatlarının məhdud olduğunu göstərib.
Məqalədən məlum olur ki, müharibəyə hazırlıq ətrafında məxfilik olduqca yüksək səviyyədə olub. Müdafiə naziri Pit Heqset və Birləşmiş Qərargah Rəisləri Komitəsinin sədri general Den Keyn hazırlıq prosesindən xəbərdar olan şəxslərin dairəsini Pentaqon və Mərkəzi Komandanlığın məhdud sayda zabitlərindən ibarət qrupla məhdudlaşdırıblar. Hətta maliyyə naziri və energetika naziri də planlaşdırma prosesinə cəlb edilməyib.
Dünyanın müxtəlif regionlarında xidmət edən komandirlər də qarşıdakı zərbədən son ana qədər xəbərsiz olublar. Mərkəzi Komandanlığın məsuliyyət zonasına konkret sursatların göndərilməsi ilə bağlı məxfi əmrlər döyüş əməliyyatlarının başlanmasına cəmi bir həftə qalmış, heç bir izahat verilmədən onlara çatdırılıb.
Almaz Həsənli
