Rostov və ətraf bölgə dronlarla hücuma məruz qaldı: yanğın anbarları və istehsal müəssisələrini bürüyüb

Rostov-na-Donu və Rostov bölgəsinə 13 noyabr gecəsi hücum edilib. Zərbələr bölgədə yanğınlara səbəb olub: Rostovun özündə bir istehsal müəssisəsi, Aksayski rayonunda isə 1500 kvadratmetrlik anbar binası yanıb.

Oxuməni.az xəbər verir ki, bu barədə OSINT ictimai qrupları məlumat yayıb.

Şahidlərin sözlərinə görə, yanğınlar başlamazdan əvvəl bölgədə partlayış səsləri eşidilib və Rusiya hava hücumundan müdafiə sistemləri aktiv olub. Daha sonra səmada yanğınların parıltısı müşahidə edilib.

Rostov vilayətinin qubernatoru Yuri Slyusar hücumu təsdiqləyib. Onun sözlərinə görə, Rostovun Sovetski rayonundakı sənaye müəssisəsinə ziyan dəyib. Orada təxminən 20 kvadrat metr sahəni əhatə edən yanğın baş verib. İlkin məlumatlara görə, hadisə nəticəsində heç kim xəsarət almayıb. Təcili yardım xidmətləri hadisə yerində işləyir.

Bölgənin Aksayski rayonunda daha bir yanğın baş verib. Orada təxminən 1500 kvadrat metr sahəni əhatə edən anbar alovlanıb. Hazırda cavab tədbirləri görülür və mümkün itkilər barədə məlumatlar dəqiqləşdirilir. Daha sonra qubernator hücumun digər nəticələri barədə məlumat verib. Rostovun Oktyabrski rayonunda beşmərtəbəli yaşayış binasının pəncərələri zədələnib və sakinlər təxliyə edilib.

Bundan əlavə, üç avtomobil yanıb. Azovski rayonunun Koluzayevo kəndində dam örtüyü, qapı və şüşələr də daxil olmaqla dörd fərdi evə ziyan dəyib. Evlərdən birində qaz borusu da zədələnib.

Əziz MUSTAFA