Bəzi deputatlar və fermerlər “Təbiəti Bərpa” qanununu bəyənmirlər

Yeni qanun 2030-cu ilə qədər Aİ-nin quru və dəniz səthinin 20 faizində təbiətin mühafizəsini nəzərdə tutur. Kənd təsərrüfatı üçün daha az yer var.

Avropalı fermerlər Brüsseldə “Təbiəti Bərpa” qanununa etiraz edirlər. O, 2030-cu ilə qədər Aİ-nin quru və dəniz səthinin ən azı 20%-nin mühafizəsini nəzərdə tutur. Kənd təsərrüfatı üçün daha az yer var. “Copa-Cogeca” kənd təsərrüfatı birliyinin rəhbəri Pekka Pesonen Avropa Komissiyasının qanunu geri götürməsini istəyir və bildirir ki:

“Qanun bizim ərzaq istehsal etmək imkanlarımızı azaldacaq. Biz daha çox idxal edəcəyik. Ona görə də bir çox QHT və vətəndaş cəmiyyəti təşkilatları bunu ölkələrimiz üçün risk kimi görür. Biz Avropa vətəndaşlarını qidalandırmaq istəyirik və yeni qanun bu məqsədi ciddi şəkildə təhdid edir. Bu bizim kənd təsərrüfatımızdır”.

Aİ-də ərazinin 81%-i zəif qorunma statusuna malikdir. Arıların, quşların və kəpənəklərin sayı getdikcə azalır. Ekosistemlər əziyyət çəkir. Bu məsələ Avropa Parlamentində müzakirə olunur. Mərkəz sağçılar debatda iştirak etməmək qərarına gəlib.

Avropa Xalq Partiyasından olan Belçikalı deputat Tom Vandenkendelar məsələni belə izah edir:

“Biz təbiətin bərpasına qarşı deyilik, biz pis qanunvericiliyə qarşıyıq və buna görə də EPP Təbiətin Bərpası haqqında qanunu indiki formada rədd etməyə hazırdır”.

Bu qanun Aİ-da yaşıl sövdələşmənin əsas elementidir. Mərkəz sol, yaşıllar və bəzi liberal deputatlar qanunu bu ilin sonuna qədər qəbul etmək istəyirlər.

Avstriyalı “yaşıl” Sara Viner insanların sağlamlığı üçün təhlükə görərək deyir ki:

“Ərzaq təhlükəsizliyi üçün bizə hər kəs üçün işləyən ekoloji cəhətdən davamlı sistemlər lazımdır. Biz təbiətin bir hissəsiyik və ətrafımızdakı təbiət xəstədirsə, sağlam qala bilmərik. Biz antibiotiklər, kimyəvi maddələr yeyirik. Heç kim bunu yemək istəmir.”

Xatırladaq ki, bu qanun Aİ-nin bütün 27 ölkəsindən ətraf mühitə dair tədbirlər həyata keçirməyi tələb edən ilk məcburi qanun olacaq. Brüsselin 100 milyard avroluq büdcəsi bu səyləri dəstəkləyəcək.

Murad Şahməmmədov