Tramp Rusiyanın Ukraynada atəşkəsə razılaşacağına ümid edir

Birləşmiş Ştatlar Rusiyanın Ukraynada atəşkəsə razılaşacağına ümid edir və amerikalı emissarlar bu problemi müzakirə etmək üçün Moskvaya səfər edirlər. Bunu ABŞ prezidenti Donald Tramp Ağ Evdə İrlandiyanın baş naziri Maykl Martinlə görüşündə jurnalistlərin suallarını cavablandırarkən deyib.

"İndi bu, Rusiyadan asılıdır", - Amerika lideri hesab edir. O, Ukrayna ətrafında yaranmış vəziyyəti martın 11-də Ciddədə keçirilən danışıqlar fonunda şərh edib. "Biz danışdıqca insanlar Rusiyaya gedirlər" deyə Tramp bəyan edib. "Ümid edək ki, Rusiyadan atəşkəs əldə edə bilək", - Vaşinqton administrasiyasının rəhbəri deyib.

Eyni zamanda, o, açıqlamalarını dəqiqləşdirmədən artıq müəyyən müsbət siqnallar aldığını qeyd edib. “Mən bəzi müsbət mesajlar aldım. Lakin müsbət mesaj heç nə demək deyil”, - deyə prezident bildirib. Onun sözlərinə görə, konkret addımlar atılmalıdır. “Vəziyyət çox ağırdır. Bu, üçüncü dünya müharibəsinə səbəb ola biləcək vəziyyətdir”, - Tramp vurğulayıb.

Martın 11-də ABŞ və Ukrayna nümayəndə heyətləri Ciddədə danışıqlar aparıb. Danışıqlardan sonra verilən birgə bəyanatda qeyd olunur ki, Kiyev 30 günlük atəşkəsə və Vaşinqtonla faydalı qazıntılar üzrə saziş imzalamağa hazırdır. Bunun müqabilində ABŞ Ukrayna ilə hərbi yardım və kəşfiyyat mübadiləsini dərhal bərpa edəcəyinə söz verib.

Əziz Mustafa, Oxuməni.az