Rusiya elektron müharibə sistemlərini NATO sərhədlərinə yaxınlaşdırır

Rusiya elektron müharibə sistemlərini Estoniya ilə sərhədə yaxın ərazidə yerləşdirib. Bu, Baltikyanı ölkələrdə narahatlıq doğurur.

Bloomberg xəbər verir ki, bu barədə Estoniyanın daxili işlər naziri İqor Taro bildirib.

Estoniya hakimiyyət orqanlarının məlumatına görə, Rusiya ordusu Estoniya ilə sərhəddən təxminən 20 kilometr aralıda yerləşən Kinqisepp bölgəsinə radio siqnallarının tıxanması üçün əlavə avadanlıq çatdırıb.

Ölkənin Daxili Təhlükəsizlik Agentliyi bu hadisə ilə bağlı Rusiya hərbçiləri ilə əlaqə saxlayıb.

Eyni zamanda, Rusiya Müdafiə Nazirliyi hələlik bu məlumatı şərh etməyib.

Qeyd olunur ki, bu cür avadanlıq Ukraynada döyüş meydanında pilotsuz təyyarələrdən gələn naviqasiya siqnallarının qarşısını almaq üçün istifadə edilib. Bununla belə, elektron müharibə kommersiya təyyarələri və gəmiləri tərəfindən istifadə edilən Qlobal Mövqeləşdirmə Sistemi və ya GPS-ə də ciddi müdaxilələrə səbəb olur.

Xatırladaq ki, ötən il Avropa ölkələrində GPS siqnalında nasazlıqların qeydə alındığı bildirilmişdi. Səbəb kimi Rusiyanın Kalininqrad vilayətində elektron döyüş bazasından istifadə etməsi göstərilib.

Əziz Mustafa