Hyundai 2025-2028-ci illərdə ABŞ-a 21 milyard dollar sərmayə qoyacaq

Cənubi Koreyanın Hyundai Motor Group şirkəti 2025-2028-ci illər arasında ABŞ iqtisadiyyatına 21 milyard dollar sərmayə qoyacaq. Şirkətin press-relizinə görə, investisiyalar istehsal potensialının genişləndirilməsi, təchizat zəncirlərinin gücləndirilməsi və qabaqcıl texnologiyaların inkişafı üçün istifadə olunacaq.

Xüsusilə, Hyundai ABŞ-da avtomobil istehsalının artırılmasına 9 milyard dollar sərmayə qoyacaq. Gücünün genişləndirilməsi ona hər il ölkədə Hyundai Motor, Kia və Genesis markalı 1,2 milyon avtomobil istehsal etməyə imkan verəcək, press-relizdə qeyd olunur.

Bundan əlavə, şirkət Alabama və Corciya ştatlarında istehsal müəssisələrinin modernləşdirilməsi üçün vəsaitdən istifadə etməyi planlaşdırır.

Hyundai, elektromobillər üçün akkumulyatorlar da daxil olmaqla avtomobil komponentləri istehsalının daha çox lokallaşdırılmasına nail olmaq üçün ABŞ-da logistika və polad biznesinin inkişafına 6 milyard dollar sərmayə qoymağı planlaşdırır.

Hyundai Steel bölməsi 2029-cu ilə qədər Luizianada ildə 2,7 milyon ton polad istehsal gücünə malik polad zavodu tikməyi planlaşdırır. Bu layihəyə investisiyalar 5,8 milyard dollar təşkil edəcək, ABŞ Prezidenti Donald Tramp bazar ertəsi Ağ Evdə Hyundai şirkətinin baş direktoru Çunq Eysun və Luiziana ştatının qubernatoru Ceff Landri ilə görüşü zamanı bildirib.

Bundan əlavə, Hyundai innovativ layihələrə və Amerika şirkətləri ilə avtonom idarəetmə, robot texnikası və süni intellekt kimi sahələrdə strateji tərəfdaşlıqların genişləndirilməsinə 6 milyard dollar sərmayə qoyacaq.

Ümumilikdə bununla da ABŞ-da 14000 birbaşa tam iş yerinin yaradılması gözlənilir.

Əziz Mustafa, Oxuməni.az