“Nvidia” dünyanın ilk 5 trilyon dollarlıq şirkəti oldu
“Bloomberg” bazar məlumatlarına istinadən xəbər verir ki, Amerikalı çip istehsalçısı Nvidia, bazar kapitallaşması 5 trilyon dolları keçən dünyada ilk korporasiya oldu. Çip istehsalçısının səhmləri Nyu-Yorkda ticarət açılışında 4,91% artaraq 210,90 dollara çatdı.
Cəmi dörd ay əvvəl Nvidia-nın bazar dəyəri 4 trilyon dollarlıq həddi keçdi və o vaxtdan bəri artımı sürətləndi. Microsoft və Apple bu mərhələni keçən yeganə şirkətlərdir.
Səhmlərin artımı güclü satışlar, Samsung Electronics, Hyundai Motor ilə bir sıra böyük müqavilələr və Avropa şirkəti Nokia ilə son tərəfdaşlıq sayəsində baş verir. Nvidia strateji tərəfdaşlığın bir hissəsi olaraq Nokia-ya 1 milyard dollar investisiya qoyur. Nokia səhmləri 28 oktyabrda 28,8% artaraq bağlanışda 22,2%-ə düşdü.
Nvidia şirkətinin səhm qiymətlərinin artmasının digər səbəbi Donald Trampın Çin prezidenti Si Cinpinlə Blackwell çiplərini müzakirə etmək niyyətidir. “Bloomberg”-in məlumatına görə, ABŞ prezidenti əvvəllər Nvidia şirkətinin çipin sadələşdirilmiş versiyasını Çinə ixrac etməsinə icazə verəcəyini qeyd etmişdi və investorlar razılaşmaya ümid edirlər.
Şirkətin baş direktoru Censen Huanq, ABŞ prezidenti Donald Trampın Çin prezidenti Si Cinpin ilə görüşəcəyi APEC sammitində iştirak etmək üçün Cənubi Koreyaya səfər edəcək. Müzakirə mövzularına süni intellekt texnologiyalarının inkişafı və ticarət məhdudiyyətləri daxildir.
Nvidia, ChatGPT də daxil olmaqla, generativ süni intellekt modellərini öyrətmək və idarə etmək üçün istifadə edilən qrafik prosessorlar (GPU) istehsal edir. Şirkət həmçinin Ağ Evin çip istehsalını ABŞ-a qaytarmaq strategiyasını dəstəkləmək üçün OpenAI-yə 100 milyard dollar və Intel-ə 5 milyard dollar investisiya qoymaq planlarını açıqladı.
Almaz Həsənli
