Gümüşün qiyməti tarixində ilk dəfə unsiya başına 70 dolları keçdi

Gümüşün birja dəyəri tarixində ilk dəfə unsiya başına 70 dolları keçib. Bazar ertəsi günü Comex birjasında gümüşün mart fyuçersləri 2,32% bahalaşaraq zirvədə unsiya başına 70,15 dollara çatıb. Bakı vaxtı ilə saat 13:31-ə qədər artım unsiya başına 69,62 dollara qədər yavaşlayıb.

Qiymətlərə ABŞ və Venesuela arasındakı geosiyasi gərginliyin artması dəstək verir, bu barədə Nemo.Money analitikləri bildirirlər.

"Qiymətli metalların qiymətlərinin bu qədər gec rekord səviyyələrə çatdığını nəzərə alsaq, bəlkə də ən əsas nəticə ondan ibarətdir ki, investorlar bayram tətilini mənfəəti qeyd etmək üçün bir səbəb kimi görməyiblər", - Mitsubishi analitikləri bildiriblər.

İlin əvvəlindən bəri gümüş iki dəfədən çox bahalaşıb və qızılın artımını xeyli üstələyib. Reuters-in məlumatına görə, ilin əvvəlindən bəri gümüşün artımı 140%-ə çatıb.

Qızıldan fərqli olaraq, gümüşün daha böyük sənaye tərkib hissəsi var. TechStock nəşri onun artımını investisiyaların axını və təklifdə davamlı kəsir fonunda süni intellektə malik məlumat mərkəzləri, günəş enerjisi və elektrikli avtomobillərdən gələn uzunmüddətli tələblə əlaqələndirir.

Analitiklər qeyd edirlər ki, gümüş bazarı qızıl bazarından daha kiçik və daha dəyişkəndir, buna görə də eniş daha kəskin ola bilər. İl sonuna yaxınlaşdıqca, daha aşağı ticarət həcmləri düzəliş ehtimalını artırır, StoneX analitiki Mett Simpson xəbərdarlıq edib.

Almaz Həsənli