Çində hazırlanmış şaquli qalxma və enmə elektrik təyyarəsinin ilk uçuşu uğurla başa çatıb

Çin Aerokosmik Elm və Texnologiya Korporasiyasının Doqquzuncu Akademiyası tərəfindən hazırlanmış şaquli qalxma və enmə elektrik təyyarəsi (eVTOL) cümə günü Çunçin şəhərində (Cənub-Qərbi Çin) ilk uçuşunu uğurla başa çatdırıb. Oxuməni.az-ın məlumatına görə, bu barədə "Sinxua" agentliyi xəbər verir.
Tərtibatçının sözlərinə görə, elektrik mühərrikli şaquli qalxma və enmə aparatı təyyarə və avtomobil dizaynını birləşdirən yeni konfiqurasiyaya malikdir və müxtəlif nəqliyyat ehtiyaclarını ödəmək üçün yerüstü və hava hərəkəti rejimləri arasında asanlıqla keçid edə bilir.
eVTOL təyyarəsi qanadlardan, kabinədən və şassidən ibarətdir. Hava modulu iki sərnişini 3000 metrə qədər hündürlükdə, saatda 150 kilometrə qədər sürətlə daşıya bilər. Tam elektrikli ağıllı şassi ilə təchiz olunmuş yerüstü modulun hərəkət məsafəsi 300 km-dən çoxdur.
Tərtibatçı qeyd edib ki, aşağı hündürlükdə uçuşlar üçün çoxfunksiyalı aparat kimi eVTOL platforması nəqliyyat, logistika və fövqəladə hallarda dəstək kimi sahələrdə istifadə oluna bilər.
Almaz Həsənli