Rusiya və İran aprelin 1-dən Rəşt-Astara dəmir yolu xətti layihəsinin icrasına başlayacaq

"Şimal-Cənub" beynəlxalq nəqliyyat dəhlizi çərçivəsində Rəşt-Astara dəmir yolu xətti layihəsinin praktiki icrasına 2026-cı il aprelin 1-dən başlanacaq.
Oxuməni.az-ın TASS-a istinadən verdiyi məlumata görə, bu barədə jurnalistlərə Rusiya və İran arasında ticarət-iqtisadi əməkdaşlıq üzrə hökumətlərarası komissiyanın iclası çərçivəsində Rusiya Federasiyasının energetika naziri Sergey Tsivilyov bildirib.
Energetika Nazirliyinin rəhbərinin sözlərinə görə, tərəflər layihənin başlanmasına mane olan bütün mübahisəli məsələləri həll edə biliblər. Tsivilyov deyib: ""Şimal-Cənub" dəhlizi təkcə enerji dəhlizi deyil, həm də nəqliyyat dəhlizidir. Onunla Rəşt-Astara dəmir yolu xəttinin tikintisi bağlıdır. Biz əvvəllər mövcud olan demək olar ki, bütün məsələləri, o cümlədən torpaqların rəsmiləşdirilməsi, güzəştlərin alınması məsələlərini həll etdik. Biz bu gün danışdıq ki, aprelin 1-də Rusiyada nəqliyyat həftəsində bu layihənin icrasına başlanması barədə yekun razılaşma əldə olunacaq."
Nazir tikintiyə hazırlıqla məşğul olan müvafiq mütəxəssislərin işini yüksək qiymətləndirib.
O əlavə edib: "Mən bu layihə üzərində işləyən bütün işçi qruplarımıza təşəkkür etmək istəyirəm. Bu, çox çətindir, lakin icra zamanı bütün problemləri həll etmək mümkün oldu. Biz artıq cəsarətlə deyə bilərik ki, aprelin 1-dən bu genişmiqyaslı infrastruktur layihəsinin icra mərhələsinə keçirik."
2023-cü ildə Rusiya və İran "Şimal-Cənub" layihəsi çərçivəsində İran və Azərbaycan arasında Fars körfəzi limanlarına birbaşa keçidi təmin edəcək 160 kilometrlik Rəşt-Astara yol hissəsinin birgə tikintisi haqqında saziş imzalayıblar. Layihənin ümumi dəyəri 1,6 milyard avrodur. Moskva və Tehran layihələndirməni, tikintini, habelə malların və xidmətlərin tədarükünü birgə maliyyələşdirəcəklər.
Almaz Həsənli