Xoruzların kənd yerlərində banlamaq hüququnu qoruyan qanun qəbul edilib

Fransanın kəndlərinə köçən və xoruzların banlaması, itlərin hürməsi, təsərrüfat texnikasının səsi və ya peyin iyindən narahat olan insanlar üçün şikayət etmək o qədər də asan olmayacaq.

Fransa parlamenti qonşular arasında münaqişələri məhdudlaşdırmaq və “yeni kənd sakinlərinin” fermerlərə qarşı “zərərli” iddialar qaldırmasının qarşısını almaq məqsədi daşıyan qanun qəbul edib.

Hakim çoxluqda olan millət vəkili Nikol Le Peyh tərəfindən təqdim edilən və prezident Emmanuel Makron hökuməti tərəfindən dəstəklənən layihə 12 əleyhinə 78 səslə qəbul edilib və səsvermə üçün Senata göndərilib.

Ədliyyə naziri Erik Dupond-Moretti sosial media platformasındakı paylaşımında "Bu qanun işi yalnız bizi qidalandırmaq olan fermerlərə qarşı pis niyyətli iddialara son qoyacaq. Bu sağlam düşüncəli təklifdir, fermerlərin sağlam düşüncəsidir" deyə bildirib.

Fransa və qonşu dövlətlər kəndlilərlə onların yeni qonşuları arasında uzun müddət davam edən qarşıdurma tarixinə malikdirlər.

BFM TV-nin məlumatına görə, hazırda 500-ə yaxın fermer təsərrüfatlarından gələn səs-küydən və ya qoxudan narahat olan qonşular tərəfindən məhkəmə iddiaları ilə üz-üzədir.

Oxuməni.az