Danimarka Ukraynanı peyk rabitəsi ilə təmin edəcək

Danimarka hökuməti Avropa İttifaqının Müdafiə Agentliyi (EDA) vasitəsilə Ukraynanı peyk rabitəsi xidmətləri ilə təmin etmək qərarına gəlib.

Bu barədə Danimarka Müdafiə Nazirliyinin mətbuat xidməti məlumat yayıb.

Müdafiə naziri Troels Lund Poulsenin qeyd etdiyi kimi, bu qərarla Danimarka Ukraynanın kosmik müdafiəsinə öz töhfəsini verəcək.

"Kosmos müdafiə siyasətindən getdikcə daha çox diqqət tələb edən sahədir. Aİ Müdafiə Agentliyi ilə sıx əməkdaşlıqda Danimarka hazırda Rusiyaya qarşı müdafiəsində Ukraynanın peyk rabitəsini gücləndirməyə kömək edir. Kosmik həllər Ukrayna, Danimarka və Avropanın müdafiəsini gücləndirməyə kömək edə biləcək böyük potensiala malikdir", - o deyib.
Qeyd olunur ki, layihə çərçivəsində Ukrayna Silahlı Qüvvələri peyk rabitəsinə çıxış üçün xüsusi terminallara çıxış əldə edəcək.

"Bu, Ukraynanın Rusiyanın qeyri-qanuni işğalına qarşı azadlıq uğrunda mübarizəsini davam etdirmək qabiliyyətinə böyük töhfə verəcək. Terminallar hərbi əməliyyatlar üçün həlledici ola biləcək etibarlı və təhlükəsiz rabitə təmin edəcək. Bu həll Ukrayna tərəfindən tələb olunur", - Danimarka Müdafiə Nazirliyi bildirir.

Departamentdə qeyd olunduğu kimi, EDA nümayəndələri digər Aİ ölkələrinin Danimarkadan nümunə götürəcəyini və Ukrayna Silahlı Qüvvələri üçün də analoji layihələrin həyata keçirilməsi imkanlarını nəzərdən keçirəcəklərini gözləyirlər.
Xatırladaq ki, may ayında Danimarka hökuməti Ukraynaya 4 milyard Danimarka krondan (536 milyon avro) çox dəyərində yeni hərbi yardım paketi elan etmişdi.

Aprel ayında Danimarka hökuməti Ukrayna üçün 6,7 milyard Danimarka kronu (təxminən 995 milyon dollar) dəyərində yeni müdafiə paketi elan edib. Vəsaitlər 2025-2027-ci illər ərzində paylanacaq. Paketə hava hücumundan müdafiə sistemləri, artilleriya silahları və Ukrayna Hərbi Hava Qüvvələrinə maliyyə dəstəyi daxildir.

Həmçinin mart ayında Danimarka Müdafiə Nazirliyi xüsusi innovasiya fonduna təxminən 40 milyon avro sərmayə qoymaq niyyətini açıqlayıb. Onun məqsədi müasir müharibə şəraitində Ukrayna ordusunun texnoloji imkanlarını gücləndirməkdir.

Bundan əlavə, Ukrayna silahları Danimarkada istehsal olunacaq. Müvafiq saziş iyulun 4-də Kopenhagendə imzalanıb.

Əziz Mustafa