BƏƏ-nin “Autocraft” şirkəti Çində 350 “hava taksisi” üçün əvvəlcədən sifariş verib

Birləşmiş Ərəb Əmirliklərinin (BƏƏ) “Autocraft” şirkəti çərşənbə günü Çinin elektrik şaquli uçuş və eniş (eVTOL) təyyarə istehsalçısı “Shanghai TCab Technology Co., Ltd.” ilə ümumi dəyəri 1 milyard dollar olan 350 E20 eVTOL təyyarəsi almaq üçün anlaşma memorandumu imzalayıb. Bu barədə Oxuməni.az “Sinxua” Xəbər Agentliyinə istinadla xəbər verir.
Bu, Çində bu günə qədər eVTOL üçün olan ən böyük ön sifarişdir.
Razılaşmanın “TCab Tech”-in E20 hava taksilərinin Yaxın Şərq və Şimali Afrikada alçaq hündürlükdə turizm və şəhər hava hərəkətliliyi proqramlarında kommersiya məqsədli istifadə olunacağı gözlənilir. Məlum olduğu kimi, E20 təyyarəsi bir pilot və dörd sərnişin üçün nəzərdə tutulub. Onun dizayn edilmiş uçuş məsafəsi 200 km, maksimal sürəti isə 320 km/saatdır.
“Autocraft”, Çinin “TCab Tech” şirkəti ilə tərəfdaşlığının motivasiyasını sonuncunun təhlükəsizlik sisteminin texnoloji yetkinliyini və potensialını tanımaqla izah edib.
Bağlanmış sifariş sənədinə əsasən, E20 eVTOL bir neçə partiyada mərhələlərlə çatdırılacaq.
Almaz Həsənli