Özbəkistana turizm məqsədilə 6,3 milyon xarici vətəndaş səfər edib

Ölkənin Statistika Agentliyinin məlumatına görə, 2025-ci ilin yanvar-iyul aylarında Özbəkistana turizm məqsədilə 6,3 milyon xarici vətəndaş səfər edib. Bu, 2024-cü ilin eyni dövrü ilə müqayisədə 2,1 milyon və ya 48,9 faiz çoxdur. Əfqanıstan, Çin və Türkmənistandan gələnlərin sayı xüsusilə kəskin artıb. Hər bir xarici turist orta hesabla xidmətlərə 403 dollar xərcləyib.

Ölkə üzrə paylama belə görünür:

Qırğızıstan - 1,84 milyon (2024-cü ildə - 1,2 milyon);
Qazaxıstan - 1,46 milyon (845,8 min);
Tacikistan - 1,44 milyon (1,2 milyon);
Rusiya - 536,8 min (442,1 min);
Əfqanıstan - 267,5 min (2,9 min);
Türkmənistan - 208,8 min (83,7 min);
Çin - 103,1 min (35,5 min);
Türkiyə - 96,5 min (62 min);
Hindistan - 38 min (33,3 min);
Cənubi Koreya - 25 min (23,9 min);
Digər ölkələr - 289 min (231 min).
Belə ki, Özbəkistana səfər edən Əfqanıstan vətəndaşlarının sayı təxminən 93 dəfə, Çin vətəndaşlarının sayı 2,9 dəfə, Türkmənistan vətəndaşlarının sayı isə 2,5 dəfə artıb. MDB ölkələri istisna olmaqla, Əfqanıstan ən böyük turist mənbəyinə çevrilib. Mütəxəssislər bunu Termizdə logistika mərkəzinin açılması ilə əlaqələndirirlər.

Bütövlükdə, bütün xarici turistlərin 82,5 faizini qonşu dövlətlərin vətəndaşları – 5,2 milyon nəfər təşkil edib.

Özbəkistanlı iqtisadçı Otabek Bakirovun sözlərinə görə, ilk 7 ayda turizm ixracı 2,54 milyard dollara çatıb ki, bu da hər bir xarici turistə orta hesabla 403 dollar təşkil edib. Müqayisə üçün qeyd edək ki, ötən il bu rəqəm 1,75 milyard dollar və ya adambaşına 416 dollar olub.

"Turistlərin sayı artsa da, keyfiyyət yaxşılaşmayıb. Biz qonşu ölkələri xarici turistlər kimi hesablamağa davam edirik. Əgər kimsə oteldən, nəqliyyatdan, yeməkdən və digər xidmətlərdən istifadə etmədən eyni gündə gəlib-gedərsə, onu tam turist saymaq olmaz. Bizə yeni meyarlar lazımdır", - ekspert bildirib.

Əziz Mustafa