Argentina Rafael Qrossinin BМТ-nin Baş katibi vəzifəsinə namizədliyini rəsmən təqdim edib
Argentinanın Xarici İşlər Nazirliyi Rafael Qrossinin Birləşmiş Millətlər Təşkilatının (BMT) Baş katibi vəzifəsinə namizədliyini rəsmən təqdim edib.
Oxuməni.az-ın “rg.ru”-ya istinadla verdiyi məlumata görə, XİN başçısı Pablo Kirno bildirib ki, onun departamenti Qrossiyə səs toplamaq üçün xüsusi qrup yaradıb. Uğurlu olacağı təqdirdə, hazırda Beynəlxalq Atom Enerjisi Agentliyinin (MAQATE) rəhbəri olan Qrossi tarixdə bu vəzifəyə gələn ilk argentinalı ola bilər.
"Birləşmiş Millətlər Təşkilatı aydın və iddialı mandatla yaradılıb: beynəlxalq sülhü və təhlükəsizliyi qorumaq, dövlətlər arasında əməkdaşlığı təşviq etmək və insan haqlarına hörməti gücləndirmək. Lakin zamanla bu məqsədlər daha az aydın oldu və nəticədə müasir dünya, çox vaxt adekvat həllini tapmayan müxtəlif münaqişələr, geosiyasi gərginliklər və mürəkkəb böhranlarla xarakterizə olunur", - Kirno təqdimat zamanı bildirib.
Nazir Xavyer Miley hökumətinin Qrossinin BMT Baş katibi vəzifəsi üçün, o cümlədən sülhməramlı tapşırıqları yerinə yetirmək üçün lazım olan keyfiyyətlərə malik olduğunu qeyd etdiyini xüsusi vurğulayıb. Kirno qeyd edib ki, MAQATE-nin baş direktoru son illərdə Rusiya prezidenti Vladimir Putinlə, həm də Vladimir Zelenski ilə əlaqə saxlayıb və danışıqlar aparıb. O, onun seçki proqramının əsas komponentlərindən birinin BMT-nin silahlı münaqişələrin həllində iştirakının aktivləşdirilməsi olacağını bildirib. Bununla əlaqədar olaraq Kirno qeyd edib ki, Buenos-Ayres argentinalının namizədliyinə dəstək qazanmaq üçün BMT Təhlükəsizlik Şurasının daimi üzvləri ilə əlaqələri gücləndirməyə xüsusi diqqət yetirməyi planlaşdırır.
Rafael Qrossi isə öz növbəsində beynəlxalq ictimaiyyətə BMT-nin vəziyyətini vicdanlı şəkildə təhlil etməyə və "təşkilatda bir çox şeyin düzgün işləmədiyini" etiraf etməyə çağırıb. "Bizə problem olan yerə gedib qollarını çırmalayıb işə girişəcək bir Baş katib lazımdır." Biz müvafiq islahatları aparmaq üçün cəsarətə sahib olmalıyıq", - o qeyd edib.
Almaz Həsənli
