Səudiyyə Ərəbistanı edam rekordunu qırdı
Səudiyyə Ərəbistanı bu il ən azı 347 nəfəri edam edib. Britaniyanın insan haqları təşkilatı Reprieve-in məlumatına görə, bu rəqəm rekorddur, BBC xəbər verir.
Təşkilat açıqlamasında bildirib ki, bu, "monitorinq başlayandan bəri krallığın ən qanlı edam ili" olub. 2024-cü ildə edamların sayı 345 nəfər olub.
Ən son edam edilən məhbuslar narkotiklə əlaqəli cinayətlərdə ittiham olunan iki Pakistan vətəndaşı olub. Bu il etirazla əlaqəli cinayətlər törətdikləri iddia edilən jurnalist və yetkinlik yaşına çatmayan iki gənc kişi də edam edilib. Beş qadın da edam edilib.
Reprieve təşkilatının məlumatına görə, əksəriyyəti - təxminən üçdə ikisi - BMT-nin "beynəlxalq norma və standartlara zidd" hesab etdiyi narkotiklə əlaqəli cinayətlərdə ittiham olunub. Bunların yarıdan çoxu xarici vətəndaşlar idi və görünür, krallığın "narkotiklə mübarizəsi" çərçivəsində edam ediliblər.
Səudiyyə Ərəbistanı hakimiyyəti edamların artması ilə bağlı rəsmi açıqlama verməyib.
Vəliəhd şahzadə Məhəmməd bin Salman son bir neçə ildə ölkəni köklü şəkildə dəyişdirərək sosial məhdudiyyətləri yumşaldıb. O, krallığı xarici dünyaya açıb, küçələrdən dini polisi çıxarıb və qadınların maşın sürməsinə icazə verib.
Lakin, başqa bir insan haqları təşkilatı olan Human Rights Watch-a görə, krallıqda insan haqları vəziyyəti "dəhşətli" olaraq qalır və edamların yüksək nisbəti ciddi narahatlıq doğurur. İnsan haqları fəallarının fikrincə, son illərdə yalnız Çin və İran daha çox insanı edam edib.
Əziz Mustafa
