Türkiyə kəşfiyyat rəisi Qəzza sülh planının ikinci mərhələsini HƏMAS ilə müzakirə edib

Türkiyənin Milli Kəşfiyyat Təşkilatının rəhbəri İbrahim Kalın şənbə günü İstanbulda radikal Fələstin HƏMAS hərəkatının nümayəndələri ilə görüş keçirib. TRT-nin təhlükəsizlik mənbələrinə istinadən verdiyi məlumata görə, danışıqların əsas mövzusu Qəzza sülh planının ikinci mərhələsinin həyata keçirilməsi olub.

HƏMAS tərəfində danışıqlar aparan nümayəndə heyətinə HƏMAS-ın siyasi bürosunun üzvü Xəlil əl-Heyya rəhbərlik edib. Mənbə qeyd edib ki, "HƏMAS atəşkəsə əməl etdiyini bildirib və İsrail tərəfinin törətdiyi pozuntular barədə məlumat verib". Mənbə bildirib ki, "Qəzzada atəşkəsə riayət olunmasını təmin etmək üçün Türkiyənin qarant ölkə kimi intensiv səyləri vurğulanıb. Bundan əlavə, İsrail tərəfindən daha çox pozuntuların qarşısını almaq üçün lazımi addımlar qiymətləndirilib. Qəzza sülh planının ikinci mərhələsinə keçmək üçün lazımi şəraitin yaradılması və mövcud problemlərin həlli ilə bağlı məsləhətləşmələr aparılıb".

Türkiyə tərəfi Qəzzaya humanitar yardım çatdırılması səyləri barədə məlumat verib. Onlar həmçinin "regional ölkələrin və beynəlxalq təşkilatların əlavə yardımın çatdırılmasını təmin etmək üçün davam edən səylərini" müzakirə ediblər.

Qəzza sülh planının həyata keçirilməsi ABŞ-da da müzakirə olunub. Türkiyə Xarici İşlər Nazirliyinin sözçüsü Oncu Keçelinin sözlərinə görə, "Türkiyə, ABŞ, Qətər və Misir nümayəndələri 19 dekabr 2025-ci ildə Mayamidə görüşüblər. Görüşdə Türkiyəni xarici işlər naziri Hakan Fidan təmsil edib". "Görüş zamanı Qəzza sülh planının birinci mərhələsinin həyata keçirilməsi ilə bağlı məsələlər müzakirə edildi və ikinci mərhələyə keçidlə bağlı fikir mübadiləsi aparıldı. Qeyd edildi ki, pozuntulara baxmayaraq, birinci mərhələdə əldə edilən atəşkəs qüvvədə qalır, girovların azad edilməsi başa çatıb və toqquşmalar əsasən dayandırılıb", - deyə o bildirib. Nizamlamanın ikinci mərhələsinə gəldikdə, Keçeli Qəzzanın idarəçiliyinin əhaliyə ötürülməsi üçün lazım olan tədbirlərin, eləcə də "Sülh Şurasının və Beynəlxalq Sabitləşdirmə Qüvvələrinin yaradılması ilə bağlı atılması lazım olan addımların" müzakirə olunduğunu qeyd edib.

Əziz Mustafa