Çin kosmik stansiyasında litium-ion akkumulyatorları ilə təcrübə aparılıb

Çinin "Tyanqun" kosmik stansiyasının göyərtəsində litium-ion akkumulyatorları (batareyaları) ilə bağlı yeni fundamental elmi təcrübə aparılıb. Oxuməni.az-ın "Sinxua" agentliyinə istinadən verdiyi məlumata görə, bu barədə Çin Elmlər Akademiyasının Dalian Kimya Fizikası İnstitutundan bildirilib.
"Şençjou-21" kosmik gəmisinin üç ekipaj üzvü tərəfindən aparılan bu təcrübə, kosmosun unikal şəraitində batareyaların işləməsinə səbəb olan mexanizmləri aşkar etməyi hədəfləyib.
Litium-ion batareyaları yüksək enerji sıxlığı və etibarlılığı sayəsində müasir kosmik uçuşlar üçün vacibdir. Lakin, adı çəkilən institutun izah etdiyi kimi, Yer şəraitində onların daxili davranışını, xüsusilə kimyəvi maddələrin elektrolitdə necə paylandığını tam anlamaq çətindir, çünki bu, çıxış gücünə və xidmət müddətinə kritik təsir göstərir.
"Yerdə aparılan təcrübələrdə əsas problem qravitasiyadır," - institutdan bildirilib. "Qravitasiya daim elektrik sahələri ilə qarşılıqlı əlaqədə olur, bu da batareyaların daxili proseslərinə təsirini müəyyənləşdirməyi çətinləşdirir."
Əksinə, kosmik stansiyadakı mikroyüngüllük şəraiti qravitasiya qüvvəsinin müdaxiləsi olmadan bu prosesləri müşahidə etmək üçün ideal bir mühit təqdim edir.
İnstitut vurğulayıb ki, mikroyüngüllük şəraitində aparılan təcrübənin nəticələri qravitasiya və elektrik sahələri arasındakı qarşılıqlı əlaqənin anlaşılmasındakı mövcud məhdudiyyətləri aradan qaldırmağa imkan verəcək.
Bu nəticələr orbitdəki mövcud batareya sistemlərini təkmilləşdirməyə və gələcək kosmik tədqiqatlar üçün daha yüksək enerji sıxlığına malik, daha təhlükəsiz yeni nəsil batareyalar hazırlamağa kömək edəcək.

Almaz Həsənli