Dior 2028-ci ilə qədər Moskvada fəaliyyətini bərpa etməyi planlaşdırır

Dior-un Rusiya hüquqi şəxsi 2028-ci ilə qədər Moskvada iki mağazasının - Stoleşnikov küçəsində və QUM-da fəaliyyətini bərpa etməyi planlaşdırır. Oxuməni.az xəbər verir ki, bu barədə "Kommersant" qəzeti brendin mühasibat hesabatına istinadən xəbər verib.
Butiklərin fəaliyyətini bərpa etmək niyyəti sənədlərə əlavə edilmiş izahat qeydində öz əksini tapıb. QUM, LVMH-nin qlobal ofisi və Stoleşnikov küçəsindəki obyektin sahibi jurnalistlərin suallarına cavab verməyib.
Mart 2022-ci ildə brend Ukraynadakı genişmiqyaslı müharibə səbəbindən Rusiyada fəaliyyətini dayandırmaq qərarına gəlib. 2023-cü ilə qədər brendin doqquz obyekti qalmışdı, onlardan səkkizi paytaxtda, biri isə Peterburqda yerləşirdi. 2024-cü ilə qədər isə yalnız dörd nöqtə qalmışdı. Bununla belə, 2024-cü ildə Christian Dior Rusiyada öz ticarət nişanının qeydiyyatını 2034-cü ilə qədər yeniləyib.
2021-ci ildə şirkətin Rusiyadakı gəliri 8,5 milyard rubl, 2025-ci ildə isə cəmi 592 min rubl təşkil edib. "Kommersant" yazır ki, şirkətin son ildəki xalis zərəri 120 milyon rubl olub.

Almaz Həsənli