İran ABŞ ilə danışıqlar üçün Pakistana nümayəndə heyətini göndərdiyini təkzib edib

İranın xarici işlər naziri Abbas Araqçi və İran Parlamentinin sədri Məhəmməd Baqer Qalibaf İslam Respublikasını tərk etməyiblər; hər ikisi Tehranda qalırlar və orada rəsmi vəzifələrini fəal şəkildə yerinə yetirirlər, Tasnim xəbər agentliyi məsələ ilə tanış olan mənbəyə istinadən xəbər verib.

"Bəzi media orqanlarında İranın danışıqlar qrupunun amerikalılarla danışıqlar üçün Pakistanın İslamabad şəhərinə gəldiyi barədə yayılan məlumatlar tamamilə yalandır", agentliyin mənbəyi bildirib.
İranın Fars xəbər agentliyi də İran nümayəndə heyətinin Pakistana gəlişi ilə bağlı xəbərləri təkzib edərək bildirib ki, Tehran "Livanda atəşkəs əldə olunana qədər Amerika tərəfi ilə sülh danışıqlarında iştirak etməyi planlaşdırmır".

Daha əvvəl "The Wall Street Journal" qəzeti İran nümayəndə heyətinin ABŞ ilə münaqişənin həlli ilə bağlı danışıqlar aparmaq üçün cümə axşamı axşam İslamabada gəldiyini bildirmişdi.

Nəşrin məlumatına görə, nümayəndə heyətinə İranın xarici işlər naziri və parlament spikeri rəhbərlik edir.

Əziz MUSTAFA