Rusiya Ermənistanı vətəndaşlarının həbsi üçün yüksək riskli ölkələr siyahısına daxil edib

Rusiya vətəndaşları xaricə səfər edərkən üçüncü ölkələrdən ABŞ-a ekstradisiya olunma və ya saxlanılma riski barədə xəbərdar olmalıdırlar. Oxuməni.az xəbər verir ki, bu barədə Rusiya Xarici İşlər Nazirliyinin insan hüquqları üzrə çoxtərəfli əməkdaşlıq departamentinin direktoru Qriqori Lukyantsev “RİA Novosti”-yə bildirib.

"Avropa İttifaqında deyil, daha geniş mənada bir çox dövlətlərin ekstradisiya ilə bağlı müəyyən öhdəlikləri var. İnsanlar xaricə səfər edərkən qarşılaşa biləcəkləri riskləri qiymətləndirərkən bütün bunları nəzərə almalıdırlar", - deyə Lukyantsev bildirib.

Diplomat vurğulayıb ki, Xarici İşlər Nazirliyi rusiyalılara haraya getməli, haraya getməməli olduğunu müəyyən etmir. Nazirlik yalnız o hallarda müəyyən ölkələrə səfər etməməyi tövsiyə edə bilər ki, vətəndaşlar ABŞ və ya Avropa hakimiyyətləri ilə münasibətlərdə problem yaşaya biləcəklərini düşünürlər.

Rusiya Xarici İşlər Nazirliyinin dərc etdiyi məlumata görə, ABŞ-ın tələbləri əsasında Rusiya vətəndaşlarının saxlanılma riski yüksək olan ölkələrə Avropanın əksər hissəsi və Latın Amerikası, həmçinin Avstraliya, Kanada, Ermənistan, İsrail, Maldiv adaları, Cənubi Koreya, Sinqapur, Tayland, Fici, Şri-Lanka, Liberiya və Mərakeş daxildir. Eyni zamanda, nazirlik qeyd edir ki, bu siyahı ABŞ ilə ekstradisiya müqavilələri olan bütün ölkələri əhatə etmir.

Almaz Həsənli