Böyük Britaniyada uşaq istismarı qalmaqalı: Dəstə üzvləri 277 il həbs cəzasına məhkum edilib

Böyük Britaniyada həssas qızlara qarşı illərlə cinsi istismarla bağlı iş üzrə 20 təqsirləndirilən şəxs ümumilikdə 277 il həbs cəzasına məhkum edilib. Məlumata görə, qurbanlardan biri zorakılıq zamanı cəmi 12 yaşında olub. Təqsirləndirilən şəxslər təcavüz, cinsi təcavüz, narkotik təchizatı və məcburi fahişəlikdə günahkar biliniblər. Məhkəmə prosesi zamanı bəzi təqsirləndirilən şəxslər 28 ilə qədər həbs cəzasına məhkum edilib və polis qeyd edib ki, cinayətlər qurbanların cəsarəti sayəsində açılıb.

Qərbi Yorkşir polisi tərəfindən aparılan araşdırma nəticəsində məlum olub ki, hadisələrin əksəriyyəti Dewsbury və Batley ərazilərində baş verib.

Qurbanlardan birinin zorakılığa məruz qaldığı zaman cəmi 12 yaşında olduğu və cinayətlərin 1995-2003-cü illər arasında baş verdiyi bildirilir.

2023-cü ilin iyul ayında Lids Tac Məhkəməsində başlayan məhkəmə prosesi altı ayrı dinləmədən ibarət idi. Sonuncu təqsirləndirilən şəxs 2025-ci ildə məhkum edilib.
Məhkəmə sənədlərinə görə, təqsirləndirilən şəxslər qurbanlarına dəfələrlə cinsi təcavüz ediblər. Bəzi qurbanlara A sinif narkotik verildiyi və gənc qızların cinsi istismar şəbəkəsində istismar edildiyi bildirilir.

49 yaşlı Ənsar Mahmud Qayyum üç təcavüz və iki cinsi təcavüzə görə 10 il həbs cəzasına məhkum edilib. Başqa bir iş üzrə əvvəlki 20 illik cəza ilə birlikdə Qayyumun ümumi cəzası 30 il olub.

57 yaşlı Tariq Əzəm beş təcavüz və dörd cinsi təcavüzə görə 24 il həbs cəzası alıb. Zülfiqar Əli dörd təcavüzə görə 22 il 6 ay, Aurangzeb Azam isə 10 ayrı təcavüzə görə 20 il həbs cəzasına məhkum edildi.

53 yaşlı Sajid Məcid beş təcavüz və üç cinsi təcavüzə görə 28 il həbs cəzasına məhkum edildi və işdə ən ağır cəzanı alan təqsirləndirilən şəxslərdən biri oldu.
Bu işdə 87 yaşlı İbrahim Xəlifə iki təcavüzə görə 11 il həbs cəzasına məhkum edildi. Bir neçə dəstə üzvü də narkotik maddələrin tədarükündə, fahişəliyə məcbur etmədə və qanunsuz həbsdə məhkum edildi.

Təqsirləndirilən Donna Lynn fahişəliyə nəzarət etdiyinə görə üç il həbs cəzası aldı.
Kirkliz Polisinin baş detektiv müfəttişi Rob Stivens istintaqı "həssas qızlara qarşı dəhşətli zorakılıq işi" adlandırdı.

Stivens uzun məhkəmə prosesi boyunca qurbanların göstərdiyi böyük cəsarəti qeyd edərək dedi: "Bu cinayətlərin üzə çıxarılmasına imkan verən qurbanların cəsarəti idi. Onlar uzun məhkəmə prosesi boyunca ifadə verdilər və ədalətin bərqərar olmasına töhfə verdilər."

Əziz MUSTAFA