Eyfel qülləsinin pilləkənindən bir fraqment hərracda 450 mindən çox avroya satılıb
1889-cu ilə aid olan Eyfel qülləsinin orijinal pilləkəninin bir hissəsi Fransanın Artcurial Paris hərrac evində 450 000 avrodan (təxminən 889 150 manat - red.) çox qiymətə satılıb.
Bu barədə Oxuməni.az “Reuters” agentliyinə istinadən məlumat verir.
Bu fraqment qüllənin ikinci və üçüncü mərtəbələrini birləşdirən ilkin pilləkənin bir hissəsi olub və 1980-ci illərdə liftlərin quraşdırılması zamanı sökülüb.
İncəsənət əsəri? Cəmi 14 ədəd paslı rəngdə, spiral şəklində bükülmüş pilləkən. Buna baxmayaraq, məhz belə bir pilləkən fraqmenti 21 may cümə axşamı Artcurial hərrac evində 450 160 avroya satılıb. Niyə belə qiymət? Bir vaxtlar bu 14 pilləkən Eyfel qülləsinin 1665 pilləkənindən biri idi.
Satılan "Dəmir xanım"ın 2,75 metr hündürlüyündə olan hissəsi 1889-cu ildə qüllənin açılışı zamanı ikinci və üçüncü mərtəbələri birləşdirən spiral pilləkənin bir hissəsi olub. 1983-cü ildə abidənin yenidən qurulması zamanı, liftlər quraşdırılarkən, pilləkən sökülüb və 24 fraqmentə bölünüb.
Artcurial bildirir ki, bu fraqmentlərin çox azı "Fransada qalıb və ilkin sahibləri tərəfindən qorunub saxlanılıb".
40 il ərzində şəxsi kolleksiyada qalmış məhz bu fraqmentin bazara çıxması artıq bir hadisədir, buna görə də lotun ilkin qiyməti 120 000-dən 150 000 avroya qədər müəyyən edilib.
Bununla belə, yekun qiymət – 450 160 avro – rekord deyil. 2016-cı ildə Sotheby's hərrac evində satılan oxşar Eyfel qülləsi fraqmenti 523 800 avroya satılmışdı.
Paris şəhərinin əsas simvollarından birinin hissələri bütün dünyaya yayılıb. Bəzi fraqmentlər, o cümlədən, Yaponiya Yamanasi prefekturasındakı Yoisii Fondu bağlarında, Nyu-Yorkdakı Azadlıq heykəlinin yanında və həmçinin Disneylendə yerləşdirilib.
Almaz Həsənli
