Tramp İrana dəniz blokadasını ləğv etmək üçün sərt tələblər irəli sürüb
ABŞ prezidenti Donald Tramp bəyan edib ki, Vaşinqton İranın bir sıra prinsipial şərtləri yerinə yetirməsi halında genişmiqyaslı dəniz blokadasını qaldırmağa və Hörmüz boğazını açmağa hazırdır.
Bu barədə Oxuməni.az ABŞ prezidenti Donald Trampın "Truth Social" sosial şəbəkəsindəki bəyanatına istinadən məlumat yayıb.
Trampın sözlərinə görə, əsas tələb Tehranın nüvə silahı istehsalından tamamilə imtina etməsidir. O, vurğulayıb ki, İran gələcəkdə nüvə bombası hazırlamaq və ya əldə etmək imkansızlığını rəsmi olaraq təsdiqləməlidir.
Bundan sonra, ABŞ prezidentinin qeyd etdiyi kimi, Hörmüz boğazı məhdudiyyətsiz və əlavə ödənişlər olmadan beynəlxalq gəmiçilik üçün sərbəst olaraq açılmalıdır.
Tramp həmçinin bildirib ki, Amerika qüvvələri artıq dəniz akvatoriyasında yerləşdirilmiş dəniz minalarının ləğvinə başlayıblar. Onun sözlərinə görə, partlayıcı qurğuların bir hissəsi sualtı mina təmizləyən gəmilər vasitəsilə məhv edilib, mina təmizləmə işlərini isə İran hakimiyyəti başa çatdırmalıdır.
Ağ Evin rəhbəri ayrıca olaraq, əvvəllər ABŞ-ın aviazərbələrinə məruz qalmış İranın nüvə infrastrukturuna toxunub.
Onun sözlərinə görə, dağıdılmış obyektlərin xarabalıqları altında zənginləşdirilmiş materialın qaldığı iddia edilir və Vaşinqton onu çıxarmaq və məhv etmək niyyətindədir.
Tramp bəyan edib ki, belə bir əməliyyatı yalnız Amerika Birləşmiş Ştatları və Çin xüsusi texnologiyalara malik olduqları üçün həyata keçirə bilərlər. O əlavə edib ki, işlərin İran və Beynəlxalq Atom Enerjisi Agentliyi ilə koordinasiyalı şəkildə aparılması planlaşdırılır.
ABŞ prezidenti həmçinin qeyd edib ki, tərəflər arasındakı maliyyə razılaşmaları hələlik yekun qərarlar qəbul olunana qədər dondurulub.
Sonda Tramp əlavə məsləhətləşmələr üçün Ağ Evin Situasiya Otağına getdiyini bildirib.
Almaz Həsənli
