Trampın adı Kennedy Mərkəzinin fasadından bir həftə ərzində silinəcək
Con Kennedi adına İcra Sənətləri Mərkəzi, federal məhkəmənin göstərişini yerinə yetirməyə başlayıb. Göstərişə əsasən, müəssisə 12 iyun tarixinədək prezident Donald Trampın adını rəsmi adından və bina fasadından çıxarmalıdır. Oxuməni.az xəbər verir ki, bu barədə CBS News daxili xidmət qeydinə istinadən məlumat yayıb.
Sənədə əsasən, işçilərə dərhal elektron imzaları, rəsmi blankları və digər materialları yeniləyərək müəssisənin əvvəlki adını bərpa etmək tapşırılıb. Naviqasiya, lövhələr və interyer elementlərinin dəyişdirilməsi bir həftə ərzində tamamlanmalıdır.
Federal hakim Kristofer Kuper keçən həftə Ohayo ştatından olan demokrat konqresmen Coys Bitinin iddiasını təmin edib. Hakim bildirib ki, Kennedi Mərkəzinin idarə heyəti 2025-ci ilin dekabrında müəssisənin adını “Donald J. Tramp və Con F. Kennedi İcra Sənətləri Memorial Mərkəzi” olaraq dəyişmək üçün səs verdikdə səlahiyyətlərini aşmışdır.
Məhkəmə qərarına görə, Konqres aktı ilə yaradılmış müəssisənin adının dəyişdirilməsi yalnız qanunvericilərin qərarı ilə mümkündür, idarə heyətinin təşəbbüsü ilə deyil. Qərarda həmçinin qeyd olunur ki, əvvəlki qadağa mərkəzin yenidənqurma üçün bağlanmasına mane olmur, əgər idarə heyəti məsələyə “müəssisəyə qarşı bütün öhdəlikləri nəzərə alaraq” yenidən baxarsa.
Mərkəzin mətbuat xidməti tərəfindən yayılan bəyanatda rəhbərliyin “məhkəmə qərarını yerinə yetirdiyi, eyni zamanda Tramp prezidentinin xidmətlərini tanımaq və bu təşəbbüsü qorumaq üçün hüquqi imkanları qiymətləndirdiyi” vurğulanır.
Bəyanatda həmçinin qeyd olunur ki, mərkəz rəhbərliyi “mümkün variantları nəzərdən keçirir və 5 iyuldan sonra, 257 milyon dollarlıq genişmiqyaslı yenidənqurma başlayacağı tarixdən sonra mərkəzin fəaliyyət göstərib-göstərməyəcəyi barədə əlavə məlumat tezliklə təqdim ediləcək”.
Tramp ikinci müddətində idarə heyətinin bir sıra üzvlərini öz müttəfiqləri ilə əvəz edib və idarə heyəti onu sədr seçib. Yenilənmiş heyət məhz mərkəzin adının dəyişdirilməsini təşəbbüs edib.
Almaz Həsənli
