Finlandiya prezidenti Aİ-ni 40 ölkəyə qədər genişləndirməyə çağırıb
Finlandiya prezidenti Alexander Stubb Avropa İttifaqının 40 ölkəyə genişlənməsinə çağırıb. CNBC xəbər verir ki, o, bunu Helsinkidə keçirilən Eurelectric Power Summit enerji konfransında çıxışı zamanı deyib.
Stubbın sözlərinə görə, hazırkı namizəd ölkələr Ukrayna, Moldova və Gürcüstan qoşulduqdan sonra blok Böyük Britaniya, Türkiyə, Norveç, İslandiya və hətta Kanada ilə inteqrasiyanın dərinləşdirilməsini nəzərdən keçirməlidir.
Finlandiya Prezidentinin dediyi kimi, Aİ genişlənmək üçün “böyük düşünməli” və mövcud “imkanlar pəncərəsindən” yararlanmalıdır.
“Aİ-nin genişlənməsi üçün fürsət pəncərəsi kifayət qədər qısadır, çünki Ukraynada müharibə bitəndə və bəlkə də ABŞ administrasiyası dəyişəndə... o zaman insanlar ayağını qaz pedalından çəkib yenidən lazımsız şeylərdən yapışmağa başlayacaqlar”, - o deyib.
Siyasətçi əlavə edib ki, “Avropanın strateji gücü” çox vaxt ölçü və əhatəyə əsaslanır, ona görə də onun fikrincə, “tarixdə ən yaxşı Avropa siyasəti məhz Aİ-nin genişlənməsi olub”.
"Bu nöqtədə biz böyük düşünməliyik və coğrafi baxımdan biz ümumilikdə 40 Avropa dövlətini, hətta qeyri-Avropa dövlətlərini daxil etmək üçün kifayət qədər çevik olan üzvlük formalarını genişləndirməliyik və ya yaratmalıyıq" dedi Stubb.
Onun sözlərinə görə, Aİ diqqətini qərb cinahına çevirməli və 2020-ci ildə bloku tərk etmiş Britaniyanı geri qaytarmalı və ya heç olmasa “mümkün qədər yaxınlaşdırmalıdır”.
Stubb hesab edir ki, Kanada da "başqa bir seçim" kimi nəzərdən keçirilməlidir.
"Kanada ABŞ-ın 51-ci ştatı əvəzinə Avropa Birliyinin 28-ci ştatı olsa, əla olmazmı?" dedi.
Finlandiya prezidenti əlavə edib ki, Ukrayna, Moldova və Gürcüstanın Aİ-yə üzvlük məsələsini nəzərdən keçirdikdən sonra Türkiyə haqqında ciddi düşünmək və Qərbi Balkanlar, İslandiya və Norveçlə daha fəal işləmək lazımdır.
Əziz MUSTAFA
