ABŞ və İran uranın 15 il ərzində zənginləşdirilməsinə qadağa qoyulmasını müzakirə edir

Nüvə sazişi üzrə danışıqlar çərçivəsində ABŞ və İran, İslam Respublikası üçün uranın zənginləşdirilməsinə təxminən 15 il davam edə biləcək uzunmüddətli qadağa tətbiq edilməsini müzakirə edirlər. Oxuməni.az xəbər verir ki, bu barədə "The New York Times" məlumat yayıb.
Müzakirələrin əsas məqamlarından biri uranın zənginləşdirilməsinə son qoyulmasıdır. Qəzetin qeyd etdiyi kimi, ABŞ ilkin olaraq 20 illik qadağa tələb edərkən, İran bunu 10 il ilə məhdudlaşdırmağı təklif edib. Hazırda ABŞ rəsmiləri 15 illik müddətin ən ehtimal olunan kompromis variantı olduğunu düşünürlər.
Müzakirə olunan məqamlar arasında zənginləşdirilmiş uran ehtiyatlarının azaldılması, İranın əsas nüvə obyektlərinin sökülməsi və beynəlxalq inspektorların qəfil yoxlamalara buraxılması da var.
Bundan əvvəl Donald Tramp, İranla müharibənin dayandırılması barədə razılığın "iki-üç gün ərzində" imzalanacağını istisna etməmişdi. Onun sözlərinə görə, Tehran gələcək saziş çərçivəsində nüvə silahına sahib olmaq imkanından imtina edəcək və Hörmüz boğazını açacaq.
Daha əvvəl İran Xarici İşlər Nazirliyinin nümayəndəsi bildirmişdi ki, hazırda ABŞ ilə yüksək zənginləşdirilmiş uran məsələsini müzakirə etməyin heç bir mənası yoxdur. O, bunun danışıqlar prosesinin məntiqinə uyğun gəlmədiyini qeyd etmişdi.
Almaz Həsənli