ABŞ Federal Ehtiyat Sisteminin keçmiş sədri Alan Qrinspen 101 yaşında vəfat edib
Amerikalı iqtisadçı, ABŞ-ın keçmiş Federal Ehtiyat Sistemi (FES) sədri Alan Qrinspen 100 yaşında dünyasını dəyişib. Oxuməni.az xəbər verir ki, Qrinspenin həyat yoldaşı, NBC News telekanalının müxbiri Andrea Miçell bildirib ki, onun əri Parkinson xəstəliyinin ağırlaşmaları nəticəsində vəfat edib.
“Alan bu gün səhər evimizdə, 100 yaşında Parkinson xəstəliyinin ağırlaşmaları səbəbindən vəfat etdi. O, onilliklər ərzində hər iki partiyanın prezidentləri dövründə ABŞ iqtisadiyyatının formalaşmasına kömək edən görkəmli şəxs idi, lakin həmişə səhvlərini dürüst şəkildə qəbul edirdi”, – Miçellin sözlərini NBC News telekanalı gətirib.
ABŞ Federal Ehtiyat Sistemi Alan Qrinspenin vəfatı ilə bağlı “dərin kədər” ifadə edib və onun “pul-kredit siyasəti və iqtisadi düşüncəyə” verdiyi yüksək töhfəni vurğulayıb. “Onun rəhbərliyi altında FES uzunmüddətli qiymət sabitliyi dövrü təmin etdi, bu da iqtisadi artıma kömək etdi və ictimaiyyətin bu quruma inamını gücləndirdi”, – FES-in bəyanatında deyilir.
Alan Qrinspen 1987-ci ildən 2006-cı ilə qədər ardıcıl beş müddət FES-ə rəhbərlik edib, dörd ABŞ prezidenti – Ronald Reyqan, Corc Buş (ata), Bill Klinton və Corc Buş (oğul) dövründə.
Qrinspenin FES rəhbəri kimi fəaliyyəti ABŞ Mərkəzi Bankının tarixində ikinci ən uzun müddət olub. Ondan daha uzun – 19 il – bu vəzifədə Uilyam Makçesni Martin (1951-1970) çalışıb. FES-dən ayrıldıqdan sonra Qrinspen Vaşinqtonda öz konsaltinq şirkətinə rəhbərlik edib və iri maliyyə şirkətlərində məsləhətçi kimi fəaliyyət göstərib.
Almaz Həsənli
