Rusiya Qazaxıstanla benzin tədarükü ilə bağlı danışıqlar aparır
Dörd sənaye mənbəyi Reuters-ə bildirib ki, Rusiya neft emalı zavodlarının dayanması və planlaşdırılmamış təmir işləri nəticəsində yaranan daxili çatışmazlığı aradan qaldırmaq üçün Qazaxıstanla təxminən 50.000 ton AI-92 benzini idxal etmək üçün danışıqlar aparır.
Ukraynanın pilotsuz təyyarələrinin hücumlarından sonra Rusiyanın mərkəzindəki bir neçə əsas neft emalı zavodunun bağlanması benzin istehsalının illik müqayisədə təxminən 25% azalmasına səbəb olub. Moskva neft emalı zavodlarına daxili bazar üçün daha aşağı keyfiyyət standartları ilə benzin və dizel yanacağı istehsal etməyə icazə verib və benzini dəniz yolu ilə idxal etməyi planlaşdırır. Nəzərdən keçirilən digər potensial təchizat mənbəyi Rusiyanın TANECO neft emalı zavodundan qaz kondensatını emal edən və yanacaq ixrac kvotalarına sahib olan Qazaxıstanın Kondensat neft emalı zavodudur. Lakin Rusiyanın "Tatneft" şirkətinə məxsus TANECO, iyunun 12-də dron hücumundan sonra neft emalını tamamilə dayandırdı.
Qazaxıstandakı agentlik mənbəyi benzin tədarükünün Rusiya aviasiya yanacağı müqabilində mümkün olduğunu bildirdi. Digər mənbələr isə Qazaxıstanın iyul ayında artan tələbat, Atırau neft emalı zavodunda təmir işləri və Rusiyadan idxalın azalması səbəbindən aviasiya yanacağı çatışmazlığı ilə üzləşəcəyini bildirir. Hazırda Qazaxıstanda benzin artıqlığı var, lakin mənbələr 26 iyundan 20 iyula qədər Atırau neft emalı zavodunda təmir işlərinin mövcud ehtiyatları azaldacağını bildirirlər.
Qazaxıstanın Energetika Nazirliyi məsələ ətrafında danışıqların davam edib-etməməsi ilə bağlı şərh verməyib, lakin onun mətbuat xidməti bu gün bildirib ki, reaktiv yanacaq çatışmazlığı təhlükəsi yoxdur .
Reuters həmçinin nazirliyə istinadən xəbər verir ki, Energetika Nazirliyi Moskvadan benzin tədarükü üçün rəsmi sorğu almayıb.
Əziz MUSTAFA
