Rusiya saxta yollarla yüzlərlə Peru vətəndaşlarını aldadaraq Ukrayna cəbhəsinə göndərib
Yüzlərlə Peru vətəndaşı təhlükəsiz və yüksək maaşlı iş yerləri ilə bağlı yalan vədlərlə Rusiya ordusuna cəlb edilərək Ukrayna ilə döyüşlərə göndərilib. Bu barədə CNN məlumat yayıb.
Rusiyalı işəgötürənlər sosial mediadan istifadə edərək Peruda yoxsullar arasında muzdlu əsgər axtarırlar. Kişilərə arxa cəbhədə mühafizəçi və ya aşpaz kimi iş təklif olunur, müqavilə imzaladıqları üçün 20.000 dollar bonus, aylıq 4000 dollara qədər maaş və Rusiya vətəndaşlığı almaq imkanı vəd edilir.
Lakin Rusiyaya çatdıqdan sonra vəziyyət kəskin şəkildə dəyişir. Qohumlarının və yeni əsgərlərin özlərinin dediyinə görə, telefonları müsadirə olunur və tərcümə hüququ olmadan rus dilində hərbi müqavilələr imzalamağa məcbur edilirlər.
Minimal təlimdən sonra kişilər Ukraynadakı cəbhə bölgələrinə göndərilir. Perulular vəd edilmiş maaş əvəzinə qida və dərman çatışmazlığı, Rusiya komandanlığının sərt cəzaları və Ukrayna dronlarının davamlı hücumları ilə üzləşirlər. Qohumlarının sözlərinə görə, cəbhəyə göndərilən Peru vətəndaşlarından sadəcə olaraq "top yemi" kimi istifadə olunur.
Peru Prokurorluğu artıq insan alveri ilə bağlı araşdırmaya başlayıb. İndiyə qədər yaxınları aldadılan və silahlı münaqişədə iştirak etmək üçün ölkəni tərk etməyə məcbur edilən ailələrdən rəsmi olaraq otuzdan çox şikayət qeydə alınıb.
Peru Xarici İşlər Nazirliyi Moskvaya vətəndaşları haqqında məlumat və onların dərhal geri qaytarılması tələbi ilə təxminən 250 rəsmi sorğu göndərib.
Lakin nazirlik öz imkanlarının son dərəcə məhdud olduğunu etiraf edir, çünki perulular könüllü olaraq Rusiya Müdafiə Nazirliyi ilə müqavilələr imzalayıblar və bu da onları döyüş zonasından çıxarmağı faktiki olaraq qeyri-mümkün edir.
Qeyd etmək lazımdır ki, Kremlin genişmiqyaslı işə qəbul kampaniyası öz ordusundakı kəskin insan resursları böhranı ilə əlaqələndirilir. Müharibə Tədqiqatları İnstitutunun (ISW) məlumatına görə, təkcə son bir ildə Rusiya Müdafiə Nazirliyi ilə müqavilə imzalamağa və Ukraynaya qarşı müharibəyə getmək istəyən rusların sayı 20% azalıb və işə qəbulun azalması tendensiyası bir neçə ildir davam edir.
Daxili insan resurslarının çatışmazlığı səbəbindən Rusiya artıq aldatma, maliyyə manipulyasiyaları və saxta işə qəbul sxemlərindən istifadə edərək 42.000-dən çox əcnəbini muzdlu işə götürüb.
Əziz MUSTAFA
