Monakoda baş verən partlayışda ukraynalı oliqarxın ailəsinin üç üzvü yaralanıb

Monako Knyazlığında Fransa ilə sərhəddə yerləşən yaşayış binasında güclü partlayış baş verib. Nəticədə ukraynalı oliqarxın ailəsinin üç üzvü yaralanıb.

Oxuməni.az-ın verdiyi xəbərə görə bu barədə yerli Monako-Matin nəşrinin və Fransanın Le Figaro qəzetinin yaydığı məlumatda deyilir.

Partlayış bazar ertəsi axşamı, Fransa sərhədi yaxınlığındakı Rue Reverand-Père-Louis-Frolla küçəsində yerli vaxtla təxminən saat 21:00-də baş verib. Monako hökuməti rəsmi olaraq ən azı üç nəfərin ağır vəziyyətdə yaralandığını bildirib.

Fransa mediasının məlumatına görə, hər üç qurban eyni Ukrayna ailəsinin üzvləridir. 50-60 yaşlarında olan valideynlər ağır, həyati təhlükə yaradan xəsarətlər alıblar. 13 yaşlı oğlan da yaralanıb və onun vəziyyəti orta ağır hesab edilir.

Ukrayna mediası isə öz mənbələrinə istinadən bildirib ki, partlayış qurbanı Dneprdən olan tanınmış iş adamı Vadim Yermolayev olub. O və həyat yoldaşı hazırda ağır vəziyyətdədirlər.

Vadim Yermolayev "Alef" ticarət və istehsal korporasiyasının təsisçisi və şəhərin ən böyük inkişaf etdiricilərindən biridir. O, əvvəllər müntəzəm olaraq "Forbes" jurnalının Ukraynanın 100 ən varlı adamı siyahısına daxil edilmişdi, lakin sonradan Kipr pasportu xeyrinə Ukrayna vətəndaşlığından imtina edib.

2023-cü ilin dekabrında Prezident Volodimir Zelenski Milli Təhlükəsizlik və Müdafiə Şurasının Yermolayevə qarşı 10 il müddətinə şəxsi sanksiyalar tətbiq etmək qərarını qəbul edib.

Ukrayna Təhlükəsizlik Xidmətinin (SBU) məlumatına görə, məhdudiyyətlərin əsası onun işğal olunmuş Krımda alkoqol biznesi əməliyyatları olub və şirkətlər burada Rusiya Federasiyasının büdcəsinə vergi ödəyiblər.

Əziz MUSTAFA