WP: Trampın 2025-ci ildəki gəlirləri ABŞ prezidentləri üçün görünməmişdir
ABŞ prezidenti Donald Trampın 2025-ci ildə sərvətinin artması Amerika liderləri üçün görünməmişdir. Oxuməni.az xəbər verir ki, bu qiymətləndirmələr The Washington Post (WP) qəzeti tərəfindən verilmişdir.
Nəşrdə qeyd edildiyi kimi, əvvəlki ABŞ prezidentlərindən heç biri vəzifədə olduğu müddətdə bu həftə prezident Donald Trampın bildirdiyi kimi gəlirlər əldə etməmişdir. Nəşr vurğulayır ki, "Prezidentin son maliyyə bəyannaməsinə görə, onun gəlirləri keçən il 2,2 milyard dollardan çox artmışdır ki, bu da kriptovalyuta və onunla əlaqəli layihələrə yatırımlar sayəsində mümkün olmuşdur."
Trampın maliyyə bəyannaməsi 30 iyun tarixində Hökumət Etikası İdarəsi tərəfindən dərc edilmişdir. ABŞ prezidenti 2025-ci ildə təxminən 2,2 milyard dollar gəlir əldə etmişdir ki, bunun da 1 milyard dollardan çoxu kriptovalyuta ilə əlaqəli əməliyyatlardan gəlmişdir. O, xüsusilə World Liberty Financial şirkəti tərəfindən kriptovalyuta satışından təxminən 500 milyon dollar qazanmışdır. Bu şirkətdə onun oğulları Erik Tramp və kiçik Donald Tramp rəhbər vəzifələrdə çalışırlar. Vaşinqton administrasiyasının rəhbəri həmçinin $TRUMP rəqəmsal valyutasının satışından təxminən 600 milyon dollar qazanc əldə etmişdir.
Amerika lideri 2025-ci il üçün bəyannamədə sərvətinin 2,4 milyard dollardan çox olduğunu göstərmişdir. Lakin nəşr vurğulayır ki, maliyyə hesabatı qaydalarını nəzərə alaraq, ona məxsus aktivlərin dəyəri demək olar ki, daha çoxdur. Forbes jurnalının qiymətləndirməsinə görə, 2026-cı ilin mart ayında Trampın aktivlərinin ümumi dəyəri təxminən 6,5 milyard dollara çatmışdır.
Qəzet jurnalistləri tərəfindən sorğu-sual edilən ekspertlər qeyd etmişlər ki, ABŞ prezidentinin kriptovalyuta layihələrindən əldə etdiyi gəlirlər potensial maraq toqquşmalarının mövcudluğundan xəbər verə bilər. Onların qeyd etdiyi kimi, Vaşinqton administrasiyası rəqəmsal valyutalar sahəsində tənzimləmə ilə fəal şəkildə məşğul olur.
Trampın əvvəllər maliyyə bəyannamələrində göstərdiyi məlumatlara görə, 2019-cu ildə o, ən azı 440 milyon dollar, 2024-cü ildə isə prezident vəzifəsində ikinci müddətinə başlamazdan əvvəl təxminən 600 milyon dollar qazanmışdır.
Almaz Həsənli
