Əhməd əş-Şaraa Suriya parlamentinin yeni 70 üzvünü təyin edib
Suriya prezidenti Əhməd əş-Şaraa Xalq Məclisinin (parlamentin) üçdə birini təşkil edən 70 üzvünü təyin edib. Oxuməni.az xəbər verir ki, bu barədə BBC məlumat verib.
Xalq Məclisi Ali Seçki Komitəsinin sədri Məhəmməd Taha əl-Əhməd mətbuat konfransında prezidentin 143 saylı fərmanını oxuyub.
Əl-Əhməd, Ali Seçki Komitəsi tərəfindən əvvəllər təsdiqlənmiş üzvlərlə yanaşı, parlamentin üçdə birini təşkil edən kvotaya təyin edilmiş 70 nəfərin adlarını açıqlayıb. O, bu təyinatların məqsədinin fədakarlıq göstərən insanları, eləcə də təcrübə və biliyə malik mütəxəssisləri bir dam altında birləşdirmək olduğunu vurğulayıb.
Onun sözlərinə görə, Xalq Məclisi Suriya cəmiyyətinin müxtəlif təbəqələrini təmsil etməlidir.
Əl-Əhməd təyin olunmuş üzvlər arasında qadınların təmsilçiliyinin gücləndirilməsinə diqqət çəkərək, bunun ölkədəki transformasiya prosesində qadınların rolunun tanınması baxımından vacib olduğunu qeyd edib.
O, həmçinin bildirib ki, Konstitusiyaya əsasən, Xalq Məclisinin səlahiyyət müddəti 30 aydır və zərurət yarandıqda uzadıla bilər.
İlk iclas bazar ertəsi, iyulun 6-da keçiriləcək. Bu iclasda məclis üzvləri and içəcək, daha sonra parlamentin rəyasət heyəti seçiləcək və daxili nizamnamənin hazırlanması üçün komissiya yaradılacaq.
Xalq Məclisinin baş katibi Məhəmməd Həmzə Şamut bildirib ki, prezident tərəfindən təyin edilmiş 70 üzvdən 23-ü cəmiyyətin görkəmli nümayəndələri, 47-si isə müxtəlif sahələrdən olan ekspertlər və alimlərdir.
Şamutun sözlərinə görə, təyin olunmuş üzvlər arasında 12 nəfər magistr dərəcəsinə, 17 nəfər isə doktorluq dərəcəsinə malikdir.
Prezident Əhməd əş-Şaraa tərəfindən təyin edilmiş 70 üzvün əyalətlər üzrə bölgüsündə Hələb birinci yeri tutub, ondan 14 nəfər təyin edilib.
Hələbdən sonra 7 üzvlə Həsəkə, 6 üzvlə Homs və Deyr əz-Zor gəlir. Bundan əlavə, İdlib, Dəməşq, Dəməşq kəndləri və Hamadan hər birindən 5 nəfər, Dəra və Latakiyadan hər birindən 4 nəfər, Rakkadan 3 nəfər, Quneytra, Tartus və Süveydadan isə hər birindən 2 üzv təyin edilib.
Suriyadakı keçid prosesinin bir hissəsi olaraq yaradılan yeni Xalq Məclisinin konstitusiya bəyannaməsi ilə müəyyən edilmiş prinsiplərə uyğun olaraq fəaliyyət göstərməsi gözlənilir.
6 oktyabr 2025-ci ildə Suriyada keçirilən Xalq Məclisi seçkilərində Rakka, Haseke və Suveyda istisna olmaqla, 11 quberniya üzrə 50 seçki dairəsində 119 üzv seçildi.
Rakka, Haseke və Hələb quberniyasındakı Kobani kimi tanınan Əyn əl-Ərəb rayonu Suriya hökumətinin nəzarəti altına keçdikdən sonra Xalq Məclisindəki üzvlərin sayı 119-dan 140-a yüksəldi.
Almaz Həsənli
