Ukraynada qəhrəmanların milli panteonu yaradılacaq
İyulun 1-də Ali Rada Ukrayna Prezidenti Volodimir Zelenskinin irəli sürdüyü milli panteonun yaradılması haqqında qanun layihəsini dəstəkləyib. "Lehinə" 290 deputat səs verib, "əleyhinə" və "bitərəf" səs verən olmayıb. Oxuməni.az xəbər verir ki, bu barədə BBC məlumat verib.
Qanun layihəsinin mətnində qeyd olunur ki, panteon Kiyevdə yerləşəcək və xatirə kompleksi, "Ukrayna millətinin müstəqilliyin əldə edilməsi və bərpası, Ukrayna dövlətinin yaradılması və inkişafına müstəsna, tarixi əhəmiyyətli töhfə vermiş görkəmli nümayəndələrinin ümummilli xatirə və ehtiram yeri" olacaq. Bu, Kiyev Rus dövründən müasir Ukraynaya qədər görkəmli şəxsiyyətlər, həmçinin Nobel mükafatı laureatları, dünya səviyyəli elm və mədəniyyət xadimləridir.
Səsvermədən əvvəl Radanın spikeri Ruslan Stefançuk bildirib: "Dövlətimizin tarixini formalaşdıran qərarlar var. Məhz bu gün biz, IX çağırış Ukrayna Ali Radası olaraq, Ukrayna dövlətçiliyinin unikal yeri üçün qanunvericilik prinsiplərinin əsasını qoyaraq tarixi qərar qəbul edəcəyik." Stefançuk əlavə edib ki, panteonun ərazisində Ukraynanın və Ukrayna xalqının ən yaxşı oğulları və qızları son sığınacaqlarını tapacaqlar.
BBC-nin qeyd etdiyi kimi, qanun layihəsinin ortaya çıxması Ukrayna və Polşa arasında diplomatik münaqişənin kəskinləşməsi ilə üst-üstə düşüb. Bu münaqişə Zelenskinin Ukrayna Silahlı Qüvvələrinin xüsusi təyinatlı qüvvələrindən birinə "Ukrayna Üsyan Ordusunun (UPA) Qəhrəmanları" adını verməsindən sonra başlayıb. Polşada rəhbərliyi həddindən artıq millətçi baxışlara malik olan UPA -nın fəaliyyəti İkinci Dünya müharibəsi zamanı, 1940-cı illərin ortalarında Volında etnik polyakların kütləvi qətliamları ilə əlaqələndirilir. Ukraynada isə hakimiyyət UPA -nın Sovet ordusu və kommunist ideologiyası ilə mübarizəsinə diqqət yetirir.
Volodimir Zelenski panteon haqqında qanun layihəsini təqdim edərkən vurğulayıb ki, "heç kim və heç vaxt Ukraynaya hansı qəhrəmanlara hörmət etməyi göstərməyəcək". Bu təşəbbüs Polşa siyasətçiləri tərəfindən tənqid edilib. Polşanın keçmiş baş naziri Leşek Miller və ifrat sağçı "Konfederasiya" partiyasının deputatı Konrad Berkoviç cavab olaraq bildiriblər ki, "heç kim və heç vaxt Polşaya kimə kömək etməyi, kimə etməməyi göstərməyəcək".
Almaz Həsənli
