İyulun 8-dən 9-na keçən gecə ABŞ yenidən İrana zərbələr endirib

İyulun 8-dən 9-na keçən gecə ABŞ, İranın 7 iyulda ticarət gəmilərinə hücumundan sonra yenidən İrana zərbələr endirməyə başladı.

Bu barədə Oxuməni.az ABŞ Mərkəzi Komandanlığının (CENTCOM) X sosial media platformasındakı paylaşımına istinadən məlumat yayıb.

Baş Komandanın göstərişi ilə ABŞ Mərkəzi Komandanlıq qüvvələri Hörmüz boğazında naviqasiya azadlığını təhdid etmək qabiliyyətini daha da zəiflətmək üçün İrana qarşı əlavə zərbələr endirməyə başlayıblar", - deyə bəyanatda bildirilir.

Onlar əlavə ediblər ki, ABŞ İranı boğazdan sərbəst şəkildə keçən "ticarət gəmilərinə və mülki heyətlərə qarşı son zamanlar etdiyi əsassız təcavüzə görə" cəzalandırıb.

Bu arada, Axios jurnalisti Barak Ravid ABŞ rəsmisinə istinadən yazır ki, çərşənbə günü baş verən hücumlar əvvəlki günə nisbətən daha genişmiqyaslı olub.

Mənbənin məlumatına görə, hədəflər arasında İslam İnqilabı Keşikçiləri Korpusunun sahil radarları, gəmi əleyhinə raket mərkəzləri və hava hücumundan müdafiə sistemləri olub.

Hücumlar elan edildikdən sonra İran mediası cənubdakı Çabahar şəhərində elektrik kəsintiləri barədə məlumat verib. Xüsusilə, Çabahar və Konarakda təxminən 10 partlayış səsi eşidilib.

Bundan əlavə, Buşehr şəhərində partlayış səsləri eşidilib. Məlumdur ki, İranın Buşehr Atom Elektrik Stansiyası orada yerləşir. Lakin medianın məlumatına görə, elektrik stansiyasına zərər dəyməyib.
Yeni hücumlar seriyasından sonra ABŞ prezidenti Donald Tramp sosial mediada qısa bir paylaşım edərək bunun "qisas" olduğunu iddia edib.

"Bu, dünən İranın gəmiləri bombalamasına görə qisas idi. Əgər bu, yenidən baş verərsə, vəziyyət xeyli pisləşəcək", - deyə o, Truth Social-dakı paylaşımında yazıb.

NourNews-un verdiyi məlumata görə, Trampın paylaşımından əvvəl, lakin ABŞ-ın yeni hücumlarından sonra İran cavab hücumu elan etdi.

Media İran Parlamentinin Milli Təhlükəsizlik Komissiyasının sədrinin sözlərinə istinadən bildirib ki, "Amerikalılar bilməlidirlər ki, biz onlara sarsıdıcı zərbə endirəcəyik və dünyanın harasında olursa olsunlar, onları təhlükəsizliklərindən məhrum edəcəyik"

Əziz MUSTAFA