Polşada bir ukraynalı Rusiya kəşfiyyatına işləməkdə ittiham olunur

Polşada Rusiya kəşfiyyatının maraqları naminə təxribat fəaliyyətində şübhəli bilinən 18 yaşlı Ukrayna vətəndaşına qarşı ittihamlar irəli sürülüb. Müstəntiqlərin sözlərinə görə, o, Polşa-Ukrayna münasibətlərinə qarşı təxribatlarda iştirak edib və dron vasitəsilə hücum hazırlayırdı.

Oxuməni.az-ın verdiyi xəbərə görə, bu barədə The Associated Press-in yaydığı məlumatda deyilir.

Polşa prokurorluğu təqsirləndirilən şəxsin Rusiya kəşfiyyat xidmətlərinin maraqları naminə hərəkət etdiyini bildirib. Müstəntiqlər iddia edirlər ki, ona tapşırıqları yerinə yetirdiyinə görə kriptovalyuta ilə pul ödənilib və onlayn şəkildə işə götürülüb.

Polşa Daxili Təhlükəsizlik Agentliyinin məlumatına görə, gənc oğlan 2024-cü ilin noyabrından 2025-ci ilin avqustuna qədər 47 qanunsuz hərəkət törədib.

İttihamlar arasında İkinci Dünya Müharibəsinin Polşa qurbanlarına həsr olunmuş abidələrin təhqir edilməsi də var. Müstəntiqlər hesab edirlər ki, bu cür hərəkətlər Polşa ilə Ukrayna arasında gərginliyi artırmaq məqsədi daşıyırdı.

Prokurorlar həmçinin şübhəlinin dron istifadə edərək təxribat əməliyyatı planlaşdırdığını iddia edirlər. Müstəntiqlərin sözlərinə görə, o, 15 avqust 2025-ci ildə Varşavada keçirilən hərbi parad zamanı Polşa prezidentinin avtomobili üzərindən dron uçurmağı planlaşdırırdı.

O, tədbirdən əvvəl həbs edilib və hüquq-mühafizə orqanlarının məlumatına görə, bu, planın həyata keçirilməsinə mane olub. Polşa Daxili Təhlükəsizlik Agentliyi hesab edir ki, istintaq Rusiya kəşfiyyat orqanlarının polyaklar və ukraynalılar arasında münaqişəni qızışdırmağa çalışması nümunəsini ortaya çıxarıb. Agentlik bildirib ki, Moskva bu cür əməliyyatlardan iki ölkə arasında münasibətləri pozmaq üçün istifadə edir.

Son illərdə Polşa dəfələrlə Rusiyanı Ukrayna ilə münasibətləri pisləşdirməyə yönəlmiş hibrid əməliyyatlar aparmaqda ittiham edib.

Əziz Mustafa